25.06.2026 | 07:04
ԱԱ-2026. Մեքսիկան դարձյալ հաղթեց, ՀԱՀ-ը դուրս եկավ փլեյ-օֆֆ. ՏԵՍԱՆՅՈՒԹ
Վարդենիսի անձնագրային բաժանմունքը կտեղափոխվի Մարտունի․ բնակիչները դժգոհ են որոշումից
22.01.2024 | 14:04
Սահմանամերձ Վարդենիս քաղաքի անձնագրային և վիզաների վարչությունը կտեղափոխվի․ այս մասին Factor TV-ի խմբագրություն են ահազանգում բնակիչները։ Նրանք լսել են, որ փետրվարի 15-ից վարչությունը տեղափոխվելու է Վարդենիսից շուրջ 40 կմ հեռավորության վրա գտնվող Մարտունի քաղաք։
Վարդենիսի անձնագրային բաժանմունքը երկու աշխատակից ունի և գրեթե միշտ հերթում սպասող քաղաքացիներ․ որոշումը նրանց համար անակնկալ է, բաժանմունքի տեղափոխումը՝ խնդիր։ 40 հազար բնակչություն ունեցող Վարդենիս խոշորացված համայնքի անձնագրային բաժանմունքն օրական միջինում շուրջ 50 քաղաքացու է սպասարկում։ Որոշումը հանրային մեծ դժգոհություն է հարուցել․ բնակիչների գլխավոր խնդիրն այն է, որ հանրային տրանսպորտ չի գործում․ կա՛մ տաքսիով պիտի հասնեն Մարտունի քաղաք, կա՛մ մեքենայով։
Factor TV-ն տեղեկացավ, որ աշխատակիցները դեռ պատշաճ չեն ծանուցվել որոշման մասին, իրենք էլ, ինչպես բնակիչները, միայն լսել են տեղափոխման մասին։ Եթե բաժանմունքը տեղափոխվի, նրանք կկորցնեն աշխատանքը, քանի որ չեն կարող ամեն օր Վարդենիսից հասնել Մարտունի։
Մենք տեղեկացանք նաև, որ բացի Վարդենիսի անձնագրային և վիզաների վարչության բաժանմունքից տեղափոխվելու է նաև Ճամբարակի անձնագրային վարչությունը․ այն կմիավորվի Սևան քաղաքի անձնագրային և վիզաների վարչությանը։
ՀՀ ՆԳՆ խոսնակ Նարեկ Սարգսյանը Factor TV-ի հետ զրույցում հաստատեց բաժանմունքների տեղափոխման մասին լուրերը։
«Տարածքային ստորաբաժանումների օպտիմալացումը բարեփոխումների բնականոն հատվածն է։ Հաշվի են առնվում անձնագրային ստորաբաժանումների իրականացրած գործառույթները, նաև՝ բնակչության սպասարկման ծածկույթը»,- մեզ հետ զրույցում ասաց խոսնակը։
Ներքին գործերի նախարարության միգրացիայի և քաղաքացիության ծառայության հանրային կապերի պատասխանատու Նելլի Դավթյանն էլ Factor TV-ին միայն փոխանցեց, որ որոշումը կայացնելուց առաջ հաշվի են առել ամեն ինչ, իսկ բաժանմունքների տեղափոխումը բարեփոխման մաս է կազմում։
Արփի Հակոբյան
