25.04.2026 | 21:33
Մանվել Խնձրցյանը և Վազգեն Թևանյանը տպավորիչ հաղթանակներով դարձան ԵԱ-ի բրոնզե մեդալակիրներ. ՏԵՍԱՆՅՈՒԹ
Շեֆին հաճոյանալու նոր փուլը սկսված է. կարծիքներ Գալուստ Սահակյանի հայտարարության մասին
07.07.2017 | 19:25
Մեր ազգը պիտի ընդունի, որ առաջիկայում նորից Սերժ Սարգսյանը պիտի ղեկավարի երկիրը, այսօր խորհրդարանում հայտարարել է Ազգային ժողովի Հանրապետական խմբակցության պատգամավոր, ԱԺ նախկին նախագահ Գալուստ Սահակյանը: «Ժառանգություն» կուսակցության փոխնախագահ Արմեն Մարտիրոսյանի կարծիքով՝ Գալուստ Սահակյանի հայտարարության մեջ որևէ նոր բան չկա:
«Ինքը միշտ հետագա զարգացումների վերաբերյալ ճշգրիտ կերպով հանդես է եկել: Ինքը գիտի, որ այդպես է լինելու և իր ասածմները միշտ իրականանում են»,- Factor.am-ի հետ զրույցում մեկնաբանելով Գալուստ Սահակյանի հայտարարությունն՝ ասաց Արմեն Մարտիրոսյանը: Ըստ նրա՝ Գալուստ Սահակյանի հայտարարությունը ընդամենը վկայում է Սերժ Սարգսյանի և նորանկախ Հայաստանի ներքին քաղաքականության ֆիասկոյի մասին: «Մեր երկրում իշխանությունից դուրս որևէ մեկը չկարողացավ գալ իշխանության՝ չնայած հասարակության լայն աջակցությունն են ունեցել և Վազգեն Մանուկյանը, և Կարեն Դեմիրճյանը, և Ստեփան Դեմիրճյանը, և Րաֆֆի Հովհաննիսյանը, և հետագայում՝ Լևոն Տեր-Պետրոսյանը: Միայն իշխանության ներսից վերարտադրությունը սկզբնական շրջանում հնարավոր եղավ, իսկ այդ դեգրադացված կառվարման արդյունքում եկավ մի վիճակ, երբ այլևս կառվարման համակարգի ներսից էլ մարդ չունեցան»,- ասաց Մարտիրոսյանը՝ ընդգծելով, որ Հայաստանն օրեցօր դառնում է ավտորիտար երկիր: Հայաստանի Հելսինկյան կոմիտեի նախագահ Ավետիք Իշխանյանի խոսքով՝ դեռևս 2013 թվականից, երբ Սերժ Սարգսյանը նախաձեռնեց սահմանադրական փոփոխությունները, արդեն պարզ էր՝ նպատակը իր իշխանության երկարաձգումն է և դա հասկանալի էր բոլորին, այդ թվում՝ Սերժ Սարգսյանի թիմակիցներին:
«Շատ շուտով Հանրապետական կուսակցության զանազան դեմքեր կսկսեն հանդես գալ տարբեր հայտարարություններով, որ Հայաստանը պետք է ղեկավարի Սերժ Սարգսյանի նման փորձառու մարդ: Նրանք գիտեն, որ այդպես է լինելու և ուզում են հաճոյանալ շեֆին, որ իրենց լավ նայի, իրենց զավակներին, ընտանիքներին պաշտոններ ու շքաննշաներ շնորհի: Արդեն սկսվել է բնազդով հաճոյանալու գործընթացը, այսինքն՝ սա առաջին ծիծեռնակը չի, շարունակվելու են այսպիսի ելույթնները: Սա իշխանական վերնախավի էությունն է»,- կարծիք հայտնեց իրավապաշտպանը:
Հարցին՝ այսինքն՝ Հանրապետական կուսակցության ներկայացուցիչները սկսել են բացե՞լ խաղաքարտերը, թե 2018 թվականից հետո ով է լինելու վարչապետ,Իշխանյանը պատասխանեց. «Այդքան էլ այդպես չէ, որ նոր են բացում խաղաքարտերը: Անցած տարի Մարգարիտ Եսայանն ասաց՝ ով է Սերժ Սարգսյանից լավը, ինչո՞ւ պետք է նա չշարունակի ղեկավարել երկիրը, Գալուստ Սահակյանն էլ հայտարարեց, թե Սերժ Սարգսյանը հավերժ է, իսկ Էդուարդ Շարմազանովը նշեց, որ Սերժ Սարգսյանն իրենց հայրն է: Այդ ամենն արդեն դա էր նշանակում, բայց կա նշանակված վարչապետ, որն ինչ-որ իմաստով վայելում է ժողովրդի համակրանքը, փոսից ինչ-որ չափով դուրս բերեց Հանրապետական կուսակցությանը, և նրանք բոլորը իմանալով, որ վարչապետը ժամանակավոր ֆիգուր է լինելու, մի փոքր իրենց զուսպ էին պահում: Ապրիլի 2-ի ընտրություններից հետո Կարեն Կարապետյանն իր դերը կատարեց եւ հիմա հասկացնում են Կարապետյանին, որ մեծ հավակնություններ չունենա»: Ազգային ժողովի «Ելք» խմբակցության պատգամավոր Էդմոն Մարուքյանի համար եւս Գալուստ Սահակյանի այս հայտարարությունը զարմանալի չէ: «Հանրապետականները երբեք չեն հերքել, որ Սերժ Սարգսյանը կարող է լինել վարչապետ, դա նորություն չի»,- նկատեց պատգամավորը՝ հավելելով. «Բարի ծառայություն»:
Շողիկ Գալստյան
