03.06.2026 | 23:39
ՌԴ-ն մտադիր է հայկական գյուղմթերքը փոխարինել Ադրբեջանից ներմուծումներով
Ադրբեջանը չի ցանկանում ՀՀ-ի հետ բանակցել տևական և արժանապատիվ խաղաղության համաձայնագրի շուրջ․ Բաքվում ԱՄՆ նախկին դեսպան
Քաղաքականություն
18.01.2024 | 13:42
Ադրբեջանում ԱՄՆ նախկին դեսպան Ռիչարդ Կոզլարիչը կարծում է, որ Արևմուտքի և Ադրբեջանի հարաբերություններն այս տարի միայն կվատթարանան՝ «ընդդիմության նկատմամբ ճնշումների և Բաքվի կողմից Ղարաբաղի հարցում ԱՄՆ-ի ու ԵՄ-ի միջնորդական ջանքերի սաբոտաժի պատճառով»։ Այս մասին նա հայտարարել է ադրբեջանական Թուրան գործակալության վաշինգտոնյան թղթակցի հետ զրույցում։
«Ռուսաստանը և Իրանը դրանից օգուտ են քաղում։ Իլհամ Ալիևը կարծում է, որ կարող է անտեսել Վաշինգտոնի ճնշումը բարեփոխումների և խաղաղության համար»,- ասել է Կոզլարիչը, որը 1994-1997 թվականներին եղել է Ադրբեջանում ԱՄՆ դեսպանը:
Խոսելով Արցախի մասին՝ նա նշել է, որ 2024 թվականին իրական խաղաղության հասնելու որևէ քայլ չի տեսնում։
«Ոչինչ տեղի չի ունենա մինչև փետրվարին Ադրբեջանում նախագահական ընտրությունները և նոյեմբերին՝ COP29-ի համաժողովը: Ուստի դիվանագիտական գործընթացը կարող է սկսվել 2024 թվականի վերջին»,- ասել է դիվանագետը։
Նա նշել է, որ սահմանային խնդիրները շեղում են ուշադրությունը: Ադրբեջանը չի ցանկանում Հայաստանի հետ բանակցել «տևական և արժանապատիվ» խաղաղության համաձայնագրի շուրջ։
«Բաքուն ցանկանում է պարտադրել խաղաղության իր գաղափարը»,- կարծում է Կոզլարիչը։
Անդրադառնալով փետրվարի 7-ին Ադրբեջանում կայանալիք արտահերթ նախագահական ընտրություններին՝ նա նասել է, որ դրանք չեն տարբերվի նախորդներից։
«Դրանք չեն լինի ո՛չ ազատ, ո՛չ արդար։ Ալիևը կհաղթի, դա կանխորոշված է։ Ես ցավում եմ, որ դրա արդարացման համար շարունակվում են մարդու իրավունքների խախտումները»,- հայտարարել է ԱՄՆ նախկին դեսպանը։
Էմմա Չոբանյան
