ՀՀ-ում ԵՄ առաքելությունը կընդլայնվի, ֆինանսավորումը՝ կավելանա․ Եվրոպական խորհուրդը որոշում է ընդունել

Եվրոպական խորհուրդը պաշտոնապես որոշում է ընդունել ՀՀ-ում ԵՄ քաղաքացիական առաքելության ընդլայնման մասին։

Նշվում է, որ հաշվի առնելով Եվրոպական Միության մասին պայմանագիրը, մասնավորապես, դրա 42(4) և 43(2) հոդվածները և նկատի ունենալով Միության արտաքին գործերի և անվտանգության քաղաքականության գերագույն ներկայացուցչի առաջարկը; այն, որ 2023 թվականի հունվարի 23-ին Խորհուրդն ընդունել էր (CFSP) 2023/162 որոշում և ստեղծել Եվրոպական միության առաքելությունը Հայաստանում (EUMA); 2023 թվականի փետրվարի 20-ին Խորհուրդն ընդունել էր (CFSP) 2023/386 որոշումը EUMA-ի գործարկման և առաքելությանը տրամադրելու ֆինանսավորման միջոցներ 2023 թվականի հունվարի 23-ից մինչև 2025 թվականի փետրվարի 19-ն ընկած ժամանակահատվածի համար; 2023 թվականի դեկտեմբերի 5-ին Քաղաքական և անվտանգության կոմիտեն փոփոխություններ էր կատարել EUMA-ի գործառնական պլանում և համաձայնել, որ դրա ռեսուրսները պետք է ավելացվեն:

Նշվում է, որ խորհուրդը որոշել է 2023/162 որոշման (CFSP) 13-րդ հոդվածի 1-ին մասը փոխարինել հետևյալով. «2023 թվականի հունվարի 23-ից մինչև 2025 թվականի փետրվարի 19-ը ընկած ժամանակահատվածի համար EUMA-ի հետ կապված ծախսերը ծածկելու համար նախատեսված ֆինանսական հաշվետվության գումարը կազմում է 39 035 890,24 եվրո: Ցանկացած հետագա ժամանակաշրջանի ֆինանսական հաշվետվության գումարը որոշվում է Խորհրդի կողմից»։

ՀՀ-ում ԵՄ առաքելությունն իր հերթին ողջունել է Խորհրդի  որոշումը։

«Ողջունում ենք ԵԽ որոշումը EUMA-ի ընդլայնման մասին։ Առաքելության անձնակազմի ավելացումն ընդգծում է տարածաշրջանում խաղաղություն և անվտանգություն ապահովելու՝ ԵՄ հանձնառությունը»,- ասվում է առաքելության X-ի էջում գրառման մեջ։

Էմմա Չոբանյան