14.09.2026 | 18:19
Փաշինյանն ու Բունդեսթագի պատվիրակությունը քննարկել են Հայաստան–Գերմանիա և Հայաստան–ԵՄ հարաբերությունները
Վարկավորման տոկոսադրույքները 2023 թվականին բարձրացել են
Տնտեսություն
15.01.2024 | 21:20
2023 թվականի ընթացքում Հայաստանում վարկային կազմակերպությունների կողմից տրամադրվող վարկերի անվանական տոկոսադրույքները բարձրացել են։ ՀՀ Կենտրոնական բանկի հրապարակած տվյալների համաձայն՝ ՀՀ դրամով տրամադրված վարկերի տոկոսադրույքները 1 տարում միջինում աճել են 1,7%-ով, իսկ ԱՄՆ դոլարով տրամադրված վարկերի տոկոսադրույքները՝ 1,3%-ով։
Ընդ որում՝ ՀՀ դրամի դեպքում ավելացել են թե՛ իրավաբանական, թե՛ ֆիզիկական անձանց վարկավորման տոկոսադրույքները, մասնավորապես, իրավաբանական անձանց համար 2022 թվականի դեկտեմբերի 10,9%-ից 2023-ի դեկտեմբերին հասնելով 15,3%-ի, ֆիզիկական անձանց դեպքում, համապատասխանաբար, 13,9%-ից հասնելով 15,2%-ի։
ԱՄՆ դոլարով վարկավորման դեպքում իրավաբանական անձանց համար տոկոսադրույքները նույնպես աճել են՝ նշված ժամանակաշրջանում 5,9%-ից դառնալով 9,1%, իսկ ահա ֆիզիկական անձանց դեպքում արձանագրվել է վարկավորման տոկոսադրույքների նվազում՝ 14,6%-ից մինչև 11,8%։
Նշենք, որ ֆիզիկական անձանց վարկավորման տոկոսադրույքի ցուցանիշում, բացի հիփոթեքային, սպառողական և այլ վարկերի տոկոսադրույքներից, ներառվում են նաև անհատ ձեռնարկատերերին տրամադրված վարկերի տոկոսադրույքները:
Հիշեցնենք, որ ԿԲ-ն տոկոսադրույքների որոշակի նվազում է ակնկալում։ Կենտրոնական բանկի նախագահ Մարտին Գալստյանն ԱԺ ֆինանսավարկային և բյուջետային հարցերի մշտական հանձնաժողովի նիստում 2023 թվականի նոյեմբերին հայտարարել էր, որ Կենտրոնական բանկի՝ տոկոսադրույքի վերաբերյալ որոշումները ժամանակային լագով են ազդում։
Գայանե Խաչատրյան
