02.04.2026 | 13:05
Քրեական գործ կա՞ հարուցված, օդում ասելով չէ․ Արցախի ԱԺ նախագահը՝ Փաշինյանի հայտարարության մասին․ ՏԵՍԱՆՅՈՒԹ
Ֆրանսիայի հայերը տխուր են այս երեկո․ Բուիսոնը՝ Ֆրանսիայի մշակույթի նախարարի նշանակման մասին
Քաղաքականություն
12.01.2024 | 10:49
Ֆրանսիական «Le Figaro» պարբերականի փոխտնօրեն Ժան-Քրիստոֆ Բուիսոնը X-ում արված գրառմամբ անդրադարձել է Ֆրանսիայի նորանշանակ վարչապետի կողմից Մշակույթի նախարար Ռաշիդա Դաթիի նշանակմանը՝ հիշեցնելով նրա ոչ հայամետ դիրքորոշումը։ Բուիսոնը 2016 թ-ին արված մի լուսանկար է հրապարակել, որում պատկերված են Ֆրանսիայի այն ժամանակվա նախագահ Ֆրանսուա Օլանդն ու Ադրբեջանի նախագահ Իլհամ Ալիևը։ Լուսանկարն արվել է այն բանից հետո, երբ ֆրանսիացի տասը պատգամավորներ և սենատորներ կոչ են արել նախագահ Օլանդին միջնորդել ՄԱԿ-ին՝ հօգուտ Ադրբեջանի որոշում կայացնել՝ Ադրբեջանի և Հայաստանի միջև հակամարտության հարցում։
«2016թ-ին Ռաշիդա Դաթին ստորագրել է սույն դիմումը՝ Le Figaro-ի հետ զրույցում ասելով, որ «լավ ադրբեջանցիները զոհ են գնացել վատ հայերին»։ Մնացածը մենք գիտենք՝ էթնիկ զտում Արցախում՝ ադրբեջանցիների կողմից։ Ֆրանսիայի հայերը տխուր են այս երեկո»,- գրել է Բուիսոնը։
Հիշեցնենք, որ Ֆրանսիայի նորանշանակ վարչապետ Գաբրիել Աթալը ձևավորում է իր կաբինետը։ Նա զբաղեցրած պաշտոնից ազատել է արտաքին գործերի նախարար Կատրին Կոլոննային՝ նշանակելով 38-ամյա Ստեֆան Սեժուրնեին,իսկ մշակույթի նախարար Ռիմա Աբդուլ Մալաքին փոխարինել է Ռաշիդա Դաթիով։ Ի դեպ, բազմաթիվ ֆրանսիացիների համար անակնկալ է եղել Դաթիի մուտքը Էմանուել Մակրոնի թիմ, քանի որ նա Ֆրանսիայի նախկին նախագահ Նիկոլա Սարկոզիի կառավարությունում արդարադատության նախարարն էր։
Նշենք, որ Դաթին դարձել է առաջին մահմեդական կինը, որը խոշոր պետական պաշտոն է զբաղեցրել Ֆրանսիայում։
Անահիտ Խաչատրյան
