Հիփոթեքին ուղղվող եկամտային հարկի վերադարձի համակարգը դադարեցնելու նախագիծը հավանություն ստացավ ԱԺ հանձնաժողովում

Հիփոթեքային վարկի տոկոսադրույքի մարմանն ուղղվող եկամտային հարկի վերադարձի համակարգը 2027 թվականից չի գործի Երևանին հարակից մարզերում, 2029-ից՝ մյուս մարզերում: Երևանում դրա դադարեցման վերջնաժամկետը 2025 թվականի հունվարի 1-ն է, այսինքն՝ դրանից հետո ստացվող վարկերի մասով այլևս հիփոթեքային վարկերի սպասարկման տոկոսների վերադարձ չի կատարվի:

ՀՀ հարկային օրենսգրքում փոփոխություններ կատարելու մասին օրենքի նախագիծը առաջին ընթերցմամբ ստացավ ԱԺ տնտեսական հարցերի մշտական հանձնաժողովի հավանությունը։

Ըստ Ֆինանսների փոխնախարար Արման Պողոսյանի՝ նախագծի նպատակներից է հիփոթեքային վարկերի սպասարկման գծով վերադարձվող եկամտային հարկի գումարների անշեղ աճը զսպելը երկարաժամկետ հեռանկարում:

«Բարձր ու միջին եկամտային խմբերում գտնվողների համար եկամտային հարկի արդյունավետ դրույքաչափն էականորեն ավելի ցածր է, քանի որ վճարում ու ամբողջությամբ կամ մասամբ հետ են ստանում, քան այն քաղաքացիների եկամտային հարկի արդյունավետ դրույքաչափը, որոնք այս համակարգի շահառու չեն: Փաստացի, կարող ենք ասել, որ եկամտային հարկը ռեգրեսիվության տարրեր է պարունակում»,-ասաց Պողոսյանը:

Երևանին հարակից մարզերի համար առաջարկվում է արտոնության կիրառությունը դադարեցնել 2027 թվականի հունվարի 1-ից հետո ստացվող հիփոթեքային վարկերի գծով, իսկ մնացած մարզերի մասով՝ 2029 թվականի հունվարի 1-ից հետո՝ բացառություն նախատեսելով սահմանամերձ բնակավայրերի համար։ Փոփոխություն կլինի նաև վերադարձվող եկամտային հարկի եռամսյակային առավելագույն սահմանաչափի հարցում:

Օրենսդրությամբ այժմ սահմանված շեմը 1.5 մլն դրամ է, նախագծով առաջարկվում է այն նվազեցնել՝ սահմանելով 750 հազար դրամ: 2023 թվականն ամփոփվել է շուրջ 52 մլրդ դրամ եկամտային հարկի վերադարձով, 2022-ին թիվը եղել է 36.5 մլրդ դրամ: Այս տարվա համար գնահատվում է շուրջ 80 մլրդ դրամ: Նախագիծն առաջին ընթերցմամբ դրական եզրակացություն ստացավ հանձնաժողովում, այն կքննարկվի լիագումար նիստում։ Ընդունման դեպքում նախագիծը մինչև վերջնական հաստատումը պետք է հավանություն ստանա Ազգային ժողովի կողմից նաև երկրորդ ընթերցմամբ: