Ալիևը մեկ ամիս է՝ չի ընդունում Բաքվում ԱՄՆ նորանշանակ դեսպանի հավատարմագրերը

Ադրբեջանի նախագահ Իլհամ Ալիևը նախօրեին ընդունել է երեք երկրների՝ Պերուի, Լյուքսեմբուրգի և Ճապոնիայի դեսպանների հավատարմագրերը։ Ադրբեջանական Թուրան գործակալությունը գրում է, որ ի տարբերություն Ճապոնիայի՝ Պերուն և Լյուքսեմբուրգը դժվար թե Ադրբեջանի համար կարևոր երկրներ անվանվեն։ Ըստ լրատվամիջոցի՝ եթե հիշել, թե ինչպես էին Ադրբեջանի ԱԳՆ-ն և խորհրդարանի անդամները նախատում Լյուքսեմբուրգին հայանպաստ քաղաքականության համար, ապա Ալիևի շփումն այդ երկրի դեսպանի հետ դժվար է բացատրել։

Միևնույն ժամանակ, Ալիևն ընդգծված անտեսում է Ադրբեջան ժամանած և մեկ ամիս Բաքվում գտնվող ԱՄՆ նոր դեսպան Մարկ Լիբիին։ Ըստ երևույթին, պաշտոնական Բաքուն չի կարողանում «ներել» Պետքարտուղարության դեմարշը, որը հայտարարել էր Բաքվի հետ համագործակցությունից հրաժարվելու մասին՝ մինչև Ադրբեջանի և Հայաստանի միջև խաղաղության պայմանագրի ստորագրումը, ինչպես նաև Ազատության աջակցության ակտի 907-րդ փոփոխության ուժի մեջ մտնելը, որն արգելում է Ադրբեջանին պետական ​​օգնության տրամադրում։

«Ինչի՞ է ուզում հասնել նման վերաբերմունքով պաշտոնական Բաքուն՝ դժվար է ասել։ Սակայն իմանալով երկրի ղեկավարության բնավորությունն ու տրամադրությունները, դժվար չէ կռահել, որ Պետքարտուղարության գործողություններն ընդունվել են որպես անձնական վիրավորանք։ Դժվար է կռահել, թե որքան ժամանակ է պահանջվում, որպեսզի այս տրամադրությունները փոխվեն։ Սակայն պատմության մեջ արդեն եղել է դեպք, երբ Բաքուն Արևմուտքի հանդեպ իր կոշտ բացասական վերաբերմունքն արագորեն փոխարինել է հաշտեցմամբ, նույնիսկ օգնություն է խնդրել։ Դա եղել է 2008 թվականին, երբ Ռուսաստանն ագրեսիա էր իրականացրել Վրաստանի դեմ և ռմբակոծել Բաքու-Ջեհյան նավթամուղը։ Այդ ժամանակ Թուրքիայում էլ քրդերն էին նավթամուղը պայթեցրել։ Եվ Բաքուն «հանկարծ հասկացել էր», որ կարող է կորցնել ամեն ինչ՝ առանց «ատելի» Արևմուտքի աջակցության։ Սակայն հիմա Բաքվում, երևում է, որոշել են, որ Լյուքսեմբուրգն ավելի մեծ աջակցություն կցուցաբերի»,- գրում է լրատվամիջոցը։

Նշենք, որ ԱՄՆ նախկին դեսպաններին Ադրբեջանի ղեկավարությունն ընդունել է Բաքու ժամանելուն պես՝ Միացյալ Նահանգներն անվանելով «ռազմավարական գործընկեր», առանց որի աջակցության երկրի էներգետիկ նախագծերը հնարավոր չէր լինի իրականացնել:

Հավվելենք, որ ԱՄՆ նորանշանակ դեսպան Մարկ Լիբին Բաքու է ժամանել դեկտեմբերի 2-ի ուշ երեկոյան։ Դեկտեմբերի 15-ին նա իր հավատարմագրերի պատճենն է հանձնել Ադրբեջանի ԱԳ նախարար Ջեյհուն Բայրամովին։

Էմմա Չոբանյան