12.01.2025 | 15:50
Յուրաքանչյուր դատավոր պետք է գործի բացառապես օրենքի և իր խղճի թելադրանքով. ՀՀ նախագահ․ ՏԵՍԱՆՅՈՒԹ
Մեր մոտեցումը ՀՀ-ի հետ հարաբերություններին ժամանակավոր կամ կարճաժամկետ չէ․ Աբդոլահիանը հանդիպել է ՀՀ-ում բնակվող իրանցիներին
Քաղաքականություն
28.12.2023 | 13:38
Այցով Հայաստանում գտնվող Իրանի ԱԳ նախարար Հոսեյն Ամիր Աբդոլահիանը նախօրեին Երևանում Կապույտ մզկիթում հանդիպել է ՀՀ-ում բնակվող մի խումբ իրանցիների, հայտնում է IRNA գործակալությունը։
«Հայաստանը մեր տարածաշրջանի քաղաքակրթության մի մասն է։ Մեր մոտեցումը Հայաստանի հետ հարաբերություններին տակտիկական, ժամանակավոր կամ կարճաժամկետ չէ։ Հայաստանի վարչապետի հետ այսօրվա հանդիպմանը մենք մանրամասն քննարկել ենք այս հարցը»,-ասել է Աբդոլահիանը՝ նշելով, որ Էբրահիմ Ռաիսիի կառավարության օրոք երկու երկրների հարաբերությունները զարգացման միտում են գրանցել։
«Մենք Հայաստանի ԱԳ նախարարի հետ զրուցել ենք քաղաքական և դիվանագիտական հատվածի խնդիրների մասին, իսկ անվտանգության խնդիրների մասին՝ Ազգային անվտանգության խորհրդի քարտուղարի հետ։ Հայաստանի վարչապետի հետ զրույցի արդյունքը վկայում է այն մասին, որ երկու երկրների հարաբերությունները ճիշտ ուղու վրա են։ Մենք օրակարգում ունենք Թեհրանի և Երևանի միջև համապարփակ և երկարաժամկետ համագործակցության փաստաթղթի մշակումը։ Այս փաստաթուղթը ամուր ճանապարհային քարտեզ կլինի հարաբերությունների ընդլայնման համար»,-նշել է Իրանի ԱԳ նախարարը։
Հիշեցնենք, որ Երևանում Աբդոլահիանը բանակցություններ էր անցկացրել ՀՀ վարչապետ Նիկոլ Փաշինյանի, ԱԳ նախարար Արարատ Միրզոյանի, ինչպես նաև՝ ԱԽ քարտուղար Արմեն Գրիգորյանի հետ։
