Ռոբերտ Քոչարյանի նկատմամբ քրեական հետապնդումը դադարեցվել է

Հայաստանի երկրորդ նախագահ Ռոբերտ Քոչարյանի նկատմամբ քրեական հետապնդումը դադարեցվել է նրան վերագրվող արարքի վաղեղմության ժամկետն անցած լինելու հիմքով։ Այս մասին Factor.am-ին հայտնեցին դատարանից։

Հիշեցնենք, որ Ռոբերտ Քոչարյանն ի սկզբանե մեղադրվում էր 2008 թվականին սահմանադրական կարգը տապալելու և Սիլվա Համբարձումյանից կաշառք ստանալու մեջ։ 2019 թվականին սահմանադրականմ կարգ տապալելու հոդվածով նրա նկատմամբ քրեական հետապնդումը դադարեցվել է, քանի որ Սահմանադրական դատարանը հակասահմանադրական է ճանաչել այդ հոդվածը, իսկ կաշառքի մասով քննությունը շարունակվում էր։

Նշենք, որ վաղեմության ժամկետն անցած լինելը քրեական հետապնդումը դադարեցնելու ոչ արդարացնող հիմք է։

Քոչարյանի փաստաբան Միհրան Պողոսյանը Factor.am-ի հետ զրույցում ասաց, որ Քոչարյանն առողջական խնդիրներ ունի, որոնցով պայմանավորված հունվարին երկրից դուրս գալու անհրաժեշտություն է առաջացել, սակայն այս օրերին օբյեկտիվ պատճառով նիստեր չեն կայանալու, որպեսզի դատարանի թույլտվությունը հնարավոր լինի ստանալ, ուստի Քոչարյանն այլընտրանք չի ունեցել, քան նման որոշում կայացնելը: «Վերջերս Կառավարության նիստերից մեկին Նիկոլ Փաշինյանն ասել է`մեզ մեղադրական դատավճիռներ են պետք, ու դատարանը, անկախ կողմերի ծանրաբեռնվածությունից, նիստեր էր նշանակվում»,-ասաց Միհրան Պողոսյանը`նշելով, որ դրա պատճառով  արդեն իսկ նախկինում ստեղծվել է իրավիճակ, երբ Քոչարյանը պայմանավորվածություն է ունեցել բուժման նպատակով երկրից դուրս գալու վերաբերյալ, սակայն նիստերը չեն կայացել և հնարավորություն չի եղել դատարանից երկրից դուրս գալու թույլտվություն վերցնելու:

Արաքս Մամուլյան