Աբդոլահիանն ու Բայրամովը քննարկել են Հայաստանի ու Ադրբեջանի միջև կարգավորման գործընթացը

Իրանի ԱԳ նախարար Հոսեյն Ամիր Աբդոլահիանն ու Ադրբեջանի ԱԳ նախարար Ջեյհուն Բայրամովը երեկ հեռախոսազրույց են ունեցել։ Իրանական Մեհր գործակալության փոխանցմամբ՝ կողմերը քննարկել են Հարավային Կովկասում զարգացումները և երկկողմ հարաբերությունները։

Ողջունելով Ադրբեջանի և Հայաստանի միջև խաղաղության բանակցությունների առաջընթացը և անդրադառնալով իր առաջիկա այցին Հայաստան՝ Ամիր Աբդոլլահիանը ևս մեկ անգամ ընդգծել է Բաքվի և Երևանի միջև կայուն խաղաղության հասնելու ուղղությամբ Իրանի կառուցողական ջանքերի շարունակականությունը։ Բայրամովն էլ, գնահատելով Իրանի կառուցողական դիրքորոշումները, դրական է գնահատել Ադրբեջանի և Հայաստանի միջև բանակցությունների ընթացքը և հույս հայտնել, որ երկու երկրների միջև վերջնական խաղաղության համաձայնագիրը կստորագրվի մոտ ապագայում։

Նաև նշվում է, որ հեռախոսազրույցում կողմերը ողջունել են այս տարվա վերջին օրերին Աստարաչայ սահմանային կամրջի նախնական բացումը և նշել այդ կամրջի կառուցման կարևորությունը երկու երկրների միջև առևտրային հարաբերությունների զարգացման գործում։

Ըստ ադրբեջանական կողմի հաղորդագրության ՝  հեռախոսազրույցի ընթացքում նախարարները մտքեր են փոխանակել Ադրբեջանի և Իրանի միջև երկկողմ և բազմակողմ համագործակցության օրակարգի, տարածաշրջանում առկա իրավիճակի, Ադրբեջանի և Հայաստանի միջև հարաբերությունների կարգավորման գործընթացի հեռանկարների շուրջ, նաև քննարկել երկկողմ հետաքրքրություն ներկայացնող տարածաշրջանային համագործակցության հարցեր։

Հիշեցնենք, որ Իրանի ԱԳ նախարարն այսօր աշխատանքային այցով ժամանելու է Հայաստան։