Բաքվում պահվող արցախցի նախկին պաշտոնյաներին ԿԽՄԿ-ն Հայաստանից ուղարկված ծանրոցներ է փոխանցել

Ադրբեջանի խոշտանգումների դեմ պայքարի կոմիտեի նախագահը, փոխնախագահը և իրավաբանական բաժնի ղեկավարն այցելել են  Պետական անվտանգության ծառայության գլխավոր քննաչական վարչությունում ապօրինի պահվող Արցախի ղեկավարներին ու պաշտոնյաներին՝ Արայիկ Հարությունյանին, Ռուբեն Վարդանյանին, Դավիթ Մանուկյանին և Լևոն Մնացականյանին։  Այս մասին ադրբեջանական լրատվամիջոցներին հայտնել է կոմիտեի փոխնախագահ Էլչին Շիրինովը։ Նա ասել է, որ այցի նպատակը եղել է նրանց պահման պայմաններին ծանոթանալը։

«Հանդիպման ընթացքում նրանք գոհունակություն են հայտնել պահման պայմաններից։ Հայտնել են, որ իրենց համար պարբերաբար զբոսանքներ են կազմակերպվում, պայմաններ են ստեղծվել ընտանիքի անդամների հետ ամենշաբաթյա հեռախոսազրույցի համար։ Նրանք ապահովված են անհրաժեշտ գրքերով, հասանելի է հեռուստացույց և էլեկտրոնային գրադարան, ինչպես նաև կարող են օգտվել մարզասրահից: Ընտանիքի անդամների խնդրանքով նրանց փաստաբան է նշանակվել։ Կարմիր խաչի միջազգային կոմիտեի ներկայացուցիչները ձերբակալվածներին Հայաստանից իրենց հարազատների կողմից ուղարկված ծանրոցներ են հանձնել»,-ասել է Շիրինովը։

Հիշեցնենք, որ Ադրբեջանի կողմից ապօրինի առևանգվել ու ձերբակալվել են Արցախի նախկին նախագահներ Արայիկ Հարությունյանը, Բակո Սահակյանը, Արկադի Ղուկասյանը, նախկին պետնախարար Ռուբեն Վարդանյանը, ԱԳ նախարար Դավիթ Բաբայանը, ԱԺ նախագահ Դավիթ Իշխանյանը, ՊԲ նախկին հրամանատար Լևոն Մնացականյանը, ՊՆ նախկին փոխհրամանատար Դավիթ Մանուկյանը։ Բաքուն նրանց կալանավորել է և շինծու քրեական գործեր հարուցել։

Էմմա Չոբանյան