Հայաստանն, իմ կարծիքով, ՌԴ-ից հեռանալու հստակ որոշում է կայացրել․ Կոլոմինա

ՆԱՏՕ-ի գլխավոր քարտուղարի Հարավային Կովկասի ու Կենտրոնական Ասիայի հարցերով հատուկ ներկայացուցիչ Խավիեր Կոլոմինան Վրաստանի Հանրային հեռուստաընկերությանը տված հարցազրույցում անդրադարձել է նաև Հայաստանի ու Ադրբեջանի միջև խաղաղության գործընթացին։

«Մենք շատ լավատես ենք Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի ստորագրած համատեղ հայտարարության առնչությամբ։ Ես վերջերս հանդիպել եմ երկու երկրների արտգործնախարարների հետ։ Այդ հանդիպումը կայացել է Սկոպյեում՝ ԵԱՀԿ նախարարական հանդիպման շրջանակներում։ Նաև հնարավորություն եմ ունեցել հանդիպելու Հայաստանի և Ադրբեջանի ղեկավարների հետ տարբեր ժամանակներում։ Մեր կարծիքով, այն, ինչ տեղի է ունենում, շատ լավ է։ ՆԱՏՕ-ն աջակցում է Հայաստանի և Ադրբեջանի միջև հարաբերությունների կարգավորմանը և կշարունակի այդ աջակցությունը»,-ասել է Կոլոմինան։

ՆԱՏՕ-ի գլխավոր քարտուղարի հատուկ ներկայացուցիչը խոսել է նաև դաշինքին մերձենալու Հայաստանի շահագրգռվածության մասին։

«Իմ կարծիքով, Հայաստանը շատ հստակ որոշում է կայացրել փոխել իր արտաքին քաղաքականությունը, հեռանալ Մոսկվայից։ Դա  մենք նույնպես ողջունել ենք, Հայաստանի քաղաքացիներն ունեն իրենց որոշումները կայացնելու ազատություն, և իրենք են դա որոշել։ Իմ կարծիքով, Հայաստանն արդեն սկսել է մերձենալ մեզ հետ։ Նրանք պահանջում են ավելի շատ համագործակցություն, նրանք պահանջում են ավելի շատ քաղաքական երկխոսություն և ՆԱՏՕ-ի ներկայացուցչության մեծացում մեր հարաբերություններում,-ասել է Կոլոմինան՝ նշելով,որ ողջունում են գործընկերների որոշումը, որոնք օգուտ են բերում տարածաշրջանի կայունությանը։