15.07.2026 | 23:23
Ջրափրկարարները քաղաքացիներին անվնաս մոտեցրել են ափ․ նրանց կյանքին վտանգ չի սպառնում
Յոթ երեխաների հետ դրսում մնացած արցախցի կնոջը Factor TV-ի ահազանգից հետո ապահովում են տնով և առաջին անհրաժեշտության պարագաներով
Հասարակություն
23.12.2023 | 23:31
Factor TV-ի հրապարակումից հետո Արցախից բռնի տեղահանված և փողոցում հայտնված բազմանդամ ընտանիքին աջակցություն է առաջարկվել։
Հիշեցնենք` Factor TV-ին երեկ գրել էր, որ Արցախից բռնի տեղահանված Հայկանուշը և նրա 7 երեխաները, որոնցից վեցն անչափահաս են, հայտնվել են դրսում։ Նրանք ցրտին շուրջ վեց ժամ մնացել էին ՀՀ կառավարության շենքի դիմաց և խնդրում էին իրենց կացարանով ապահովել։
Այսօր ընտանիքի հետ է կապվել բարեգործական կազմակերպություններից մեկը և նրանց առաջարկել անվճար բնակարան` մեկ տարի ժամկետով, Տավուշի մարզի Բարեկամավան գյուղում։
Բարերարները կապահովեն այս ընտանիքի տեղափոխումը Բարեկամավան, ընտանիքին կտրամադրվեն անկողնային պարագաներ, առաջին անհրաժեշտության այլ իրեր, սնունդ, ձմեռվա համար փայտ, ինչպես նաև ընտանի կենդանիներ:
Այս տեղեկությունը Factor.am-ի հետ զրույցում հաստատեց նաև ընտանիքի մայրը` Հայկանուշ Յակոպովնան։
Հիշեցնենք` նա երեխաների հետ Արցախից բռնի տեղահանվելուց հետո վարձով ապրել է Սյունիքի մարզի Խոտ գյուղում, պետության կողմից հաստատված աջակցությունները չստանալու հետևանքով չի կարողացել վճարել տան վարձը եւ հայտնվել դրսում։
Մեր հրապարակումից հետո Աշխատանքի և սոցիալական հարցերի նախարարությունը սկսել է զբաղվել ընտանիքին հասանելիք աջակցությունը տրամադրելու հարցերով։
Նարեկ Կիրակոսյան
