06.12.2025 | 23:56
Կապարակնքել են Գյումրիի Յոթ Վերք եկեղեցու դռները` Փաշինյանի այցից առաջ
Պատրուշևը հրահանգել է կազմակերպել Եվգենի Պրիգոժինին վերացնելը, Պուտինը դեմ չի եղել․ The Wall Street Journal
22.12.2023 | 14:44
«Վագներ» մասնավոր ռազմական խմբավորման հիմանդիր Եվգենի Պրիգոժինի մահը ավիավթարի ժամանակ սպանություն էր, որը կազմակերպել է ՌԴ Անվտանգության խորհրդի քարտուղար Նիկոլայ Պատրուշևը։ Այսպիսի պնդում է անում The Wall Street Journal-ը՝ վկայակոչելով արևմտյան հետախուզական ծառայությունների ներկայացուցիչներին և ռուսական հետախուզության նախկին սպայի, գրում է Meduza-ն։
Լրատվամիջոցի զրուցակիցների խոսքով՝ Պատրուշևը դեռևս 2022 թ-ի ամռանը սկսել է զգուշացնել Պուտինին Պրիգոժինի աճող ազդեցության մասին, սակայն, նախագահն անտեսել է նախազգուշացումները, հատկապես, որ «Վագները» հաջողություններ էր գրանցում ուկրաինական պատերազմում։
Ռուսական հետախուզության նախկին սպան պնդում է, որ ամեն ինչ փոխվել է 2022 թ-ի հոկտեմբերին՝ այն բանից հետո, երբ Պրիգոժինը զանգահարել է Պուտիին ու կոպիտ տոնով դժգոհել զինամթերքի պակասից։ Այդ խոսակցությունը լսել է Պատրուշևը, որը հետո օգտվել է դրանից Պուտինին համոզելու Պրիգոժինից հեռավորություն պահել։ Ըստ Պատրուշևի՝ նա դարձել էր վտանգավոր ու չէր հարգում Կրեմլի հեղինակությունը։
WSJ-ը նշում է, որ 2022 թվականի դեկտեմբերին «պարզ դարձավ, որ Պատրուշևը հաղթել է»։ Պուտինն անտեսել է Պրիգոժինի հրապարակային հայտարարությունները զինամթերքի պակասի մասին, ինչպես նաև նրա զանգերը։
Լրատվամիջոցը տեղեկություններով 2023 թվականի հունիսի 23-ին՝ Պրիգոժինի ապստամբության օրերին, Պատրուշևը «իր ձեռքն էր վերցրել իշխանությունը»։ Ըստ The Wall Street Journal-ի՝ Անվտանգության խորհրդի քարտուղարը հեռախոսազանգեր է կազմակերպել՝ համոզելու Պրիգոժինին դադարեցնել ապստամբությունը: Նա զանգահարել սպաներին, որոնք համակրել են «Վագներին»։ Ինքը՝ Պրիգոժինը, չի պատասխանել Կրեմլի զանգերին։
Պատրուշևը նաև զանգահարել է Բելառուսի նախագահ Ալեքսանդր Լուկաշենկոյին և Ղազախստանի նախագահ Կասիմ Ժոմարտ Տոկաևին, որպեսզի միջնորդեն լուծում գտնել։ WSJ-ի զրուցակիցները պնդում են, որ Տոկաևին ուղղված կոչը ապահովագրություն էր վատագույն սցենարից։ Ենթադրվում էր, որ եթե ռուսական բանակը չկարողանա զսպել Պրիգոժինի վարձկաններին, ապա Ղազախստանն իր զինված ուժերը կուղարկի որպես փոխադարձ օգնություն՝ ի պատասխան 2022 թվականի հունվարին ՀԱՊԿ ուժերի մուտքի երկիր, որի արդյունքում ճնշվեց խռովությունը։ Ըստ լրատվամիջոցի աղբյուրների՝ Տոկաևը հրաժարվել է նման տարբերակից։ Ռուսական հետախուզության նախկին սպան պատմել է, որ օգոստոսի սկզբին, երբ ապստամբությունը վերջացել էր, և Պրիգոժինը պետք է գնար Բելառուս, Պատրուշևը հրամայել է իր օգնականին սկսել «Պրիգոժինին վերացնելու» գործողության նախապատրաստումը։ Արևմտյան հետախուզական գործակալությունների ներկայացուցիչները պնդում են, որ ավելի ուշ ծրագիրը ցույց են տվել Պուտինին և նա չի առարկել։
Օգոստոսի 23-ին Պրիգոժինը սպասել է, մինչև թռիչքից առաջ իր ինքնաթիռը ստուգեն Մոսկվայի օդանավակայանում։ Արևմտյան հետախուզական ծառայությունների աղբյուրների համաձայն՝ հենց այդ պահին ինքնաթիռի թևի տակ փոքրիկ ռումբ է տեղադրվել։
Մոսկվայից թռիչքից անմիջապես հետո Պրիգոժինի Embraer Legacy 600 մասնավոր ինքնաթիռը կործանվել էր Տվերի մարզում։ Ինքնաթիռում գտնվող բոլոր 10 մարդիկ, այդ թվում՝ Պրիգոժինը և «Վագներ»-ի հրամանատար Դմիտրի Ուտկինը, մահացել էին։
Կրեմլը հերքում է իր առնչությունը Պրիգոժինի մահվանը: ՌԴ նախագահի մամուլի խոսնակ Դմիտրի Պեսկովը «բացարձակ սուտ» էր անվանել այն հայտարարությունները, թե Պուտինն անձամբ է Պրիգոժինի ինքնաթիռը ոչնչացնելու հրաման տվել։
ՌԴ Քննչական կոմիտեն քրեական գործ է հարուցել երթևեկության անվտանգության և օդային տրանսպորտի շահագործման կանոնները խախտելու հոդվածով, սակայն դեկտեմբերի վերջի դրությամբ Պրիգոժինի ինքնաթիռի կործանման պատճառների պաշտոնական վարկածը դեռևս չի հրապարակվել։
