15.01.2026 | 16:24
Արման Ծառուկյան․ Բոլորը վախից փախչում են ինձանից
Միջազգային ճգնաժամային խմբի նախագահն այցելել է ԼՂ-ից բռնի տեղահանվածներին
Քաղաքականություն
21.12.2023 | 12:55
Միջազգային ճգնաժամային խմբի նախագահ Կոմֆորտ Էրոն այցելել է ԼՂ-ից բռնի տեղահանված և Հայաստանում ապաստանած արցախցիներին։
«Հուզիչ է տեսնել, թե ինչպես են Լեռնային Ղարաբաղից փախստականների ընտանիքները փորձում հաստատվել Հայաստանում։ Նրանցից ավելի քան 100 հազարը փախել է այս տարվա սեպտեմբերին Ադրբեջանի կողմից տարածաշրջանը հետ գրավելու ռազմական գործողության ժամանակ»,- գրել է Էրոն X-ի իր միկրոբլոգում։
Նա նշել է, որ նախօրեի ցրտաշունչ օրն այցելել են Հայաստան-Ադրբեջան սահմանին գտնվող Նորաբակ գյուղի մի ընտանիքի։
«Նրանց բազմազավակ՝ 10 երեխա ունեցող ընտանիքի կարիքները մեծ են։ Ինչպես մյուսները՝ նրանք թողել են ամեն ինչ, առանց վերադարձի հեռանկարի: World Vision Armenia-ն միակն է, որն աջակցություն է ցուցաբերում տարածքի փախստական ընտանիքներին։ Իրավիճակին ծանոթանալու համար հանդիպեցինք տեղի գրասենյակի ղեկավար Զորիկ Կարապետյանին»,- գրել է Էրոն։
Նա հավելել է, որ «փախստականների ինտեգրումը Հայաստանում, որի բնակչությունը 3 միլիոնից քիչ է, մեծ մարտահրավեր կլինի»։
Հիշեցնենք, որ Կոմֆորտ Էրոն Հայաստանում ավելի վաղ հանդիպել է վարչապետ Նիկոլ Փաշինյանին, նախագահ Վահագն Խաչատուրյանին և այլ պաշտոնյաների։
Էմմա Չոբանյան
