16.07.2026 | 14:35
«Ամասիայի գլխավորող պանրագործարան» ընկերության արտադրական գործունեության առանձին գործառույթ է կասեցվել
Սեդրակ Քոչարյանը 19 տարեկանից զբաղվել է բիզնեսով, 20-ում շատ մեծ գումարներ է ունեցել․ Աննա Վարդապետյան. ՏԵՍԱՆՅՈՒԹ
Հասարակություն
20.12.2023 | 23:38
Գլխավոր դատախազությունը պատրաստվում է բողոքարկել ֆինանսների նախկին նախարար Գագիկ Խաչատրյանին չկալանավորելու դատավորի որոշումը։ Այս մասին «Առաջին ալիքի» եթերում նշեց Գլխավոր դատախազ Աննա Վարդապետյանը։
Գլխավոր դատախազն ակնարկել է, որ Գագիկ Խաչատրյանի առողջական վիճակը դատական նիստերի օրը վատանում է։
«Գագիկ Խաչատրյանը գալիս է դատարան, նիստը բացում են, իրեն լավ չի զգում, գնում է սանհանգույց, և 20 րոպե հետո պարզ է դառնում, որ Գագիկ Խաչատրյանը չի կարող ներկայանալ նիստերի դահլիճ»,- ասաց Աննա Վարդապետյանը՝ հույս հայտնելով, որ այստեղ դատարանի կողմից էլ դիտավորություն չկա։
Աննա Վարդապետյանը Գագիկ Խաչատրյանի, Քոչարյանների ընտանիքներին առնչվող ապօրինի ծագում ունեցող գույքերի վերաբերյալ գործերը համարել է աղմկահարույց։ «Դրանք գումարներ են, որոնք ձեռք են բերվել ոչ օրինական ճանապարհով։ Սեդրակ Քոչարյանը 19 տարեկանում սկսել է զբաղվել ձեռնարկատիրական գործունեությամբ, 20 տարեկանում մեծ ֆինանսական հոսքեր է ունեցել»,- ասել է Աննա Վարդապետյանը և նշել, որ թվերն այնքան մեծ են՝ չի կարողանում մտապահել։
Մի շարք գույքեր, որոնք պատկանում են Ռոբերտ Քոչարյանի մերձավոր գործարար Սամվել Մայրապետյանին, ըստ Վարդապետյանի, ևս կասկածելի ծագում ունեն, և դատախազությունը հայցեր է ներկայացրել՝ դրանք բռնագանձելու։
Անդրադառնալով թմրամիջոցների դեմ պայքարին՝ Աննա Վարդապետյանը խոսել է ԴԱՀԿ նախկին պետ Միհրան Պողոսյանին առնչվող քրգործից։ «Նա գտնվում է ՌԴ-ում, ռուս իմ գործընկերոջ հետ հետևողական աշխատանք ենք իրականացնում, որպեսզի անձը փոխանցվի ՀՀ-ին։ Միհրան Պողոսյանը ոչ միայն թմրամիջոցների գործով է անցնում, այլ նաև վարույթ ունենք Հակակոռուպցիոն կոմիտեում, դատարան ենք ուղարկելու։ Մի դրվագ էլ ունենք կնոջ հետ կապված, ունենք տվյալներ, որ կինը Իսպանիայում ձեռք է բերել որոշակի գույք, այս մասով նոր վարույթ ունենք, քննություն ենք իրականացնում»,- ասել է Աննա Վարդապետյանը և նշել, որ Միհրան Պողոսյանին ՀՀ վերադարձնելու բանակցությունները հուսադրող են։
Աննա Վարդապետյանը հարցազրույցը եզրափակել է՝ հայտարարելով, որ ՀՀ-ում քաղբանտարկյալներ չկան։
