«Հիմնական նախապայմանն Ադրբեջանի քաղաքացիության ընդունումն է»․ Հաջիևը՝ արցախցիների վերադարձի մասին

Ադրբեջանի նախագահի օգնական Հիքմեթ Հաջիևը  BBC World-ին տված հարցազրույցում հայտարարել է, թե Բաքուն պատրաստ է դիտարկել Արցախի հայերի բոլոր դիմումները «ռեինտեգրացիայի հարցով», գրում են ադրբեջանական լրատվամիջոցները։

Նա նշել է, թե  «չնայած Ադրբեջանի հորդորներին մնալու՝ եղել են հայեր, որոնք որոշել են լքել Ղարաբաղը»։

«Ադրբեջանն ապահովում է բոլոր հնարավորությունները, այդ թվում՝ անվտանգությունը նրանց վերադարձի համար։ Այդ իսկ պատճառով մենք ստեղծել ենք հատուկ էլեկտրոնային պորտալ՝ քաղաքացիության համար դիմումներ ներկայացնելու համար: Նախ՝ մենք պետք է որոշենք, որ հայերի վերադարձի համար պետք է լինի համապատասխան իրավական դաշտ։ Այստեղ հիմնական նախապայմաններից է Ադրբեջանի քաղաքացիության և գրանցման ընդունումը՝ Ադրբեջանի օրենքներին և կանոնակարգերին համապատասխան։ Այդ իսկ պատճառով մենք հասկացրել ենք, որ յուրաքանչյուր դեպքի հիման վրա մենք պատրաստ ենք քննարկել և ընթացք տալ բոլոր համապատասխան իրավական դիմումներին»,-ասել է Հաջիևը։

Նրա խոսքով՝ ներկայումս Ադրբեջանի և Հայաստանի միջև դիվանագիտական ​​մակարդակով բանակցություններ են ընթանում։

«Ադրբեջանը պատրաստ է խաղաղության պայմանագիր կնքել Հայաստանի հետ։ Ներկայումս Հայաստանի և Ադրբեջանի միջև առկա են դիվանագիտական ​​պարտավորություններ ուղիղ բանակցությունների միջոցով։ Կարծում եմ, որ Հայաստանին և Ադրբեջանին հաջողվեց զարմացնել աշխարհին դրական օրակարգով։ Դեկտեմբերի 7-ին երկու երկրները հանդես են եկել համատեղ հայտարարությամբ՝ հայտնելով խաղաղության օրակարգն առաջ մղելու և վստահության ամրապնդման միջոցառումներ իրականացնելու իրենց մտադրությունը»,- ասել է Ադրբեջանի նախագահի օգնականը՝ նշելով, թե Բաքուն, իբր, չի խուսափում միջնորդների մասնակցությամբ հանդիպումներից, սակայն սահմանների սահմանազատման հարցը կարող է լուծվել առանձին։

«Ադրբեջանը ուղղակի խաղաղ բանակցությունների կողմնակից է։ Միևնույն ժամանակ, մենք չենք խուսափում այլ միջնորդական ջանքերից կամ առաջարկվող լավ գաղափարներից: Բայց գլխավորն այն է, որ Հայաստանն ու Ադրբեջանը միավորվեն ու խաղաղություն հաստատեն։ Հենց խաղաղություն հաստատվի, ես հավատում եմ, որ մյուս երկրներն ու գործընկերները նույնպես կկարողանան աջակցել դրան»,-ասել  է Հաջիևը՝ հավելելով, թե «վերջին երեք ամիսները կարելի է համարել հայ-ադրբեջանական հարաբերությունների պատմության ամենահանդարտ շրջանը»։