08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
«Հաշվեհարդարի վտանգ կա». 102-րդ բազայի ՌՈ-ն ՀՀ տարածքից ապօրինի ձերբակալվածին պահում է արդեն 1 շաբաթ
Հասարակություն
15.12.2023 | 19:32
Ուկրաինայի դեմ պատերազմել չցանկացող և Հայաստանում ապաստանած Դմիտրի Սեդրակովին արդեն վեց օր է՝ ապօրինաբար պահում են 102-րդ ռազմաբազայի տարածքում, իսկ Գլխավոր դատախազությունը չի շտապում քրեական վարույթ նախաձեռնել։ Հելսինկյան քաղաքացիական ասամբլեայի Վանաձորի գրասենյակը հենց ահազանգը ստանալու օրն է դիմել Դատախազություն, սակայն գերատեսչությունից արձագանքն առայժմ սա է՝ «ներկայացված փաստերը ստուգվում են»։
Փաստաբան Անի Չատինյանը մտավախություն ունի, որ ռուսական բազայում Սեդրակովի կյանքին և առողջությանը վտանգ է սպառնում։
Դեկտեմբերի 8-ին ՀՔԱՎ գրասենյակն ահազանգ էր ստացել ռուսական իրավապաշտպան կազմակերպություններից մեկից, ըստ որի՝ ՌԴ քաղաքացի Դմիտրի Լեոնիդովիչ Սեդրակովը 2023 թվականի դեկտեմբերի 6-ին կամ 7-ին ՀՀ տարածքում՝ Շիրակի մարզի Գյումրի քաղաքում ձերբակալվել է 102-րդ ռազմական բազայի ռազմական ոստիկանության աշխատակիցների կողմից։
Առաջադրված մեղադրանքը, սակայն, այս դեպքում այդքան էլ կարևոր չէ՝ հաշվի առնելով այն հանգամանքը, որ ցանկացած պարագայում ռուսական կողմն իրավունք չուներ քաղաքացու նկատմամբ ձերբակալման գործողություններ իրականացնել ՀՀ տարածքում։
«Սա հարված է ՀՀ ինքնիշխանությանը»,- այսպես է բնորոշում ռուսական ռազմաբազայիռազմական ոստիկանության գործողություններն իրավապաշտպան Արթուր Սաքունցը։
Օրենքը մեջբերելով՝ ՀՔԱՎ-ը պահանջ է ներկայացրել նաև ՀՀ Կառավարությանը, Գլխավոր դատախազությանը և այլ իրավապահ մարմինների՝ գործադրել անհրաժեշտ բոլոր ջանքերը՝ Դմիտրի Լեոնիդովիչ Սեդրակովին ՀՀ իրավական պաշտպանության ներքո վերադարձնելու և քրեական հետապնդման վարույթ հարուցելու ՌԴ ռազմական ոստիկանության ապօրինի գործողությունների հիմքով, որպեսզի կասեցվի Դմիտրի Լեոնիդովիչ Սեդրակովի հնարավոր տեղափոխումը ՀՀ տարածքից։ Այս ահազանգից վեց օր անց որևէ արձագանք այս դիմումներին չի եղել, միայն Գլխավոր դատախազության պատասխանն առ այն, որ ահազանգն ուսումնասիրվում է։
Մանրամասները՝ տեսանյութում։
Ռոզա Վարդանյան
