12.03.2026 | 23:35
Վթար Երասխ-Երևան ավտոճանապարհին․ կան տուժածներ
«Ես մեղավո՞ր եմ, որ ծնողներս ինձ լքել են»․ վագոն-տնակում ապրող Հեղինեի երեխաներից մեկը քաղցկեղ ունի․ ՏԵՍԱՆՅՈՒԹ
Հասարակություն
15.12.2023 | 18:32
Մալաթիա-Սեբաստիա վարչական շրջանի Բաբաջանյան այգիներում գտնվող կիսաքանդ վագոն-տնակում է ապրում «Զատիկ» մանկատան նախկին սան Հեղինե Գրիգորյանը՝ երկու երեխաների հետ։ Հեղինեն պատմում է՝ երեխաներն առողջական լուրջ խնդիրներ ունեն։ 3-ամյա դուստրը, որ քաղցկեղ ունի, այս պահին Վրաստանի հիվանդանոցներից մեկում է բուժում ստանում, մյուս՝ 10-ամյա դուստրն էլ «երևանյան հիվանդություն» ունի։
Հեղինեն ասում է՝ փոքր դուստրը կորոնավիրուսային համավարակի ժամանակ սահմանների փակ լինելու պատճառով Վրաստանում է ծնվել։ Երեխայի թանկարժեք դեղերի համար ստիպված է եղել գումար հայթայթել սոցցանցերի օգնությամբ։ Ասում է՝ միայն թաղապետարանն է վերջերս մի փոքր վառելափայտով օգնել։
Աշխատանքի և սոցիալական հարցերի նախարարությունից Factor TV-ին փոխանցեցին՝ գրանցում ունենալու համար Հեղինեն պետք է դիմի անձանագրային բաժանմունք, իսկ սոցիալապես անապահով ընտանիքի կարգավիճակ ստանալու համար պետք է ներկայանա միասնական սոցիալական ծառայության տարածքային կենտրոն, որից հետո ծառայության աշխատակիցները կայցելեն ու կարիքների գնահատում կիրականացնեն։ Մինչ կլինի կարիքների գնահատում և կորոշվի թոշակ ու նպաստ հատկացնելու հարցը, Հեղինեն պատմում է՝ փողոցում էր ապրում, մոտ մեկ տարի առաջ են իրեն բերել այս վագոն-տնակ։ Տարբեր մարդիկ օգնել են, որ տնակը մի փոքր տան տեսք ստանա, սակայն հիգիենիկ պայմաններ չկան, խմելու ջուր ևս չունեն։
Երբ մեծ դուստրը դպրոցում է լինում, այդ ժամանակ էլ մայրը գնում է անձեռոցիկներ վաճառելու։ Հետո վերադառնում է, մի փոքր տաքացնում տարածքը ու փորձում ուտելիքի հարցը լուծել։
Հեղինեի 10-ամյա դստեր՝ Ջուլիետայի երազանքն էլ քրոջն առողջ և իր ու մայրիկի կողքին տեսնելն է։ Մոր խոսքով՝ դպրոցում լավ է սովորում, գրքեր է սիրում կարդալ և, ինչպես Հեղինեն է ասում, մեծի պես է խոսում ու հասկանում իրեն։
Մանրամասները՝ տեսանյութում։
Անի Թամրազյան
