«Տպավորություն է` իրենց կայանատեղին մեր տան տակով են ուզում սարքեն». քաղաքացու բողոքի հետքերով. ՏԵՍԱՆՅՈՒԹ

Ադոնցի 16/3 հասցեում բնակվող Անահիտ Օհանյանն ահազանգում է՝ իրենց սեփական տան մոտ շինարարություն է իրականացվում, որը զգալի գույքային վնասներ է հասցնում, բացի այդ՝ աղմուկից ու փոշուց հանգիստ ապրել չեն կարողանում։

Քաղաքապետարանն այդ հասցեում բազմաբնակարան շենքի կառուցման շինթույլտվություն տվել է այս տարվա օգոստոսին․ կառուցապատողը «ԱՍԴ դեվելոփմենթ» ՍՊԸ-ն է, նախագծողը՝ «Երասխ» ՍՊԸ-ն։

Factor TV-ի նկարահանման պահին շինհրապարակում տեխնիկան աղմուկով աշխատում էր, տարածքում մի մարդ էր շրջում, ներկայացավ որպես «ՆՅՈՒ ՍԻԹԻ ՓՐՈՋԵՔԹՍ» ընկերության ներկայացուցիչ, ասաց՝ ծրագիրը համատեղ են իրականացնում։ Տեսախցիկի առջև խոսել չցանկացավ, բայց նշեց, որ ամեն ինչ օրենքի շրջանակում են անում։ Ըստ նրա՝ շինարարությունը որևէ մեկին վնաս չի հասցնում, մինչդեռ Անահիտ Օհանյանը ցույց տվեց իր տան պատերին առաջացած ճաքերը՝ պնդելով, թե շինարարության հետևանքով են։

«ՆՅՈՒ ՍԻԹԻ ՓՐՈՋԵՔԹՍ» ընկերության տնօրեն Գեղամ Կիրակոսյանը մեզ հետ հեռախոսազրույցում հերքեց բոլոր մեղադրանքները։ Ասաց՝ բնակչի հետ փորձել են պայմանավորվածություն ձեռք բերել, անգամ կառուցվող շենքում տուն են առաջարկել, բայց վերջինս հավելյալ պահանջներ է ներկայացրել, թե ինչի մասին է խոսքը՝ Կիրակոսյանը չբացահայտեց։

Քաղաքացի Անահիտ Օհանյանը հաստատեց՝ այդպիսի խոսակցություն եղել է կառուցապատման սկզբում, իրենց առաջարկվել է 180 քառակուսի մետր մակերեսով բնակտարածք։ Մերժել են, քանի որ իրենց տան մակերեսն ավելի մեծ է։

Երևանի քաղաքապետի մամուլի խոսնակ Հայկ Կոստանյանը Factor TV-ին փոխանցեց, որ քաղաքապետարանում տեղյակ են խնդրից, ավելին՝ քաղաքացու բողոքի հիման վրա այցելել են շինհրապարակ, կազմել արձանագրություն հրապարակը պատշաճ չկահավորելու վերաբերյալ։ Իսկ գույքային վնասը պիտի փոխհատուցի կառուցապատողը։

Կառուցապատող-բնակիչ բանակցություններն ընթացքի մեջ են։ Թե ինչ հանգուցալուծում կունենա խնդիրը, ըստ էության, պիտի որոշեն Ադոնցի 16/3 հասցեում բնակվողներն ու բազմաբնակարան շենքի կառուցապատողը։

Մանրամասները՝ տեսանյութում։

Արփի Հակոբյան