20.12.2025 | 18:06
Ֆուտզալի միջազգային ընկերական մրցաշարի մասնակիցներից մեկը չի ժամանել Երևան
Հաստատվել է հանրակրթական ուսհաստատության ղեկավարման հավաստագրի համար հավակնորդների քննության ժամանակացույցը
Հասարակություն
11.12.2023 | 15:43
ՀՀ կրթության, գիտության, մշակույթի և սպորտի նախարարի՝ դեկտեմբերի 8-ի N 1629-Ա հրամանով հաստատվել է հանրակրթական ուսումնական հաստատության ղեկավարման իրավունքի /հավաստագրի/ համար հավակնորդների քննության և հավաստագրման ժամանակացույցը․ տեղեկացնում են ՀՀ ԿԳՄՍՆ-ից։
Համաձայն հրամանի՝ հավակնորդների քննությունները տեղի կունենան դեկտեմբերի 18-ին, 19-ին և 21-ին ՀՀ կրթության, գիտության, մշակույթի և սպորտի նախարարությունում /հասցե` ք. Երևան, Կառավարական տուն N 2/:
Նշենք՝ թեստավորումն անցկացվում է էլեկտրոնային տարբերակով նախարարության կողմից ստեղծված էլեկտրոնային համակարգի միջոցով: Թեստավորմանը մասնակցելու համար հավակնորդը ներկայացնում է անձը հաստատող փաստաթուղթ: Հավակնորդների մուտքը սենյակ դադարեցվում է թեստավորումը սկսելուց 10 րոպե առաջ:
Թեստավորման յուրաքանչյուր ճիշտ պատասխան գնահատվում է 1 միավոր, իսկ սխալ պատասխանը՝ զրո միավոր: Հավակնորդը քննության հաջորդ` հարցազրույցի փուլ է անցնում թեստավորման առաջադրանքների առնվազն 90 տոկոսին ճիշտ պատասխանելու դեպքում:
Թեստավորման փուլը հաղթահարած հավակնորդի հետ նույն օրը, իսկ տեխնիկական պատճառներով նույն օրն անցկացնելու անհնարինության դեպքում 3 աշխատանքային օրվա ընթացքում, անցկացվում է հարցազրույց:
Էլեկտրոնային թեստավորման համար հավակնորդին տրվում է 60 րոպե:
