15.01.2026 | 12:36
Նոր պատվաստանյութեր ենք ներդրել վերջին տարիներին. Ավանեսյան․ ՏԵՍԱՆՅՈՒԹ
Վրաստանի իշխող կուսակցությունը խոսել է նախագահին պաշտոնանկ անելու հնարավորության մասին
Քաղաքականություն
07.12.2023 | 20:44
Վրաստանի նախագահ Սալոմե Զուրաբիշվիլին կարող է պաշտոնանկ արվել 2024 թվականի օգոստոս-սեպտեմբեր ամիսներին։ Այս մասին հայտարարել է երկրի իշխող «Վրացական երազանք» կուսակցության ղեկավար Իրակլի Կոբախիձեն, գրում է Գրուզիա օնլայնը։
Նրա խոսքով՝ «տեղեկություններ կան, որ նման սցենարն ակտիվորեն քննարկվում է»։ Քաղաքական գործիչը, սակայն, չի ասել, թե որտեղից են նման տվյալները։
«Հավանականությունը մեծ է, որ նախագահը հրաժարական կտա։ Իրականում նրան կհեռացնեն։ Ամենայն հավանականությամբ, դա կարող է տեղի ունենալ օգոստոս-սեպտեմբերին»,- ասել է Կոբախիձեն։
Նրա կարծիքով՝ Զուրաբիշվիլին կարող է աջակցել ընդդիմության նախընտրական արշավին կամ ինքը կմասնակցի խորհրդարանական ընտրություններին։
«Կարծում եմ, որ այս մարդկանց (արմատական ընդդիմության – խմբ.) ավելի պրագմատիկ սցենարը նրան նախագահի պաշտոնում թողնելն է, քանի որ Զուրաբիշվիլին այնքան էլ ընտրական ռեսուրս չունի»,- նշել է «Վրացական երազանք»-ի ղեկավարը։
Հիշեցնենք, որ հոկտեմբերի 18-ին Վրաստանի խորհրդարանին չհաջողվեց իմփիչմենթի ենթարկել Զուրաբիշվիլիին։ Իշխող խմբակցության պատգամավորները դրա համար անհրաժեշտ թվով ձայներ չհավաքեցին։
Նրանք փորձում էին իմփիչմենթի ենթարկել Զուրաբիշվիլիին, քանի որ, չնայած կառավարության համաձայնության բացակայությանը, նա մեկնել էր արտասահմանյան շրջագայության՝ հասնելու Վրաստանի՝ Եվրամիությանն անդամակցելու թեկնածուի կարգավիճակին:
Ըստ վրացական կանոնների՝ նախագահը պարտավոր էր այդ ուղևորությունների համար ստանալ կառավարության թույլտվությունը։
