12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
«Բոյնին դրել եք, հետևեք ցուլը գա դռնիցս առնի»․ սպանդանոցում չմորթված միսն այսօրվանից կառգրավվի․ ՏԵՍԱՆՅՈՒԹ
Հասարակություն
06.12.2023 | 20:21
Այսօրվանից Հայաստանում արգելվում է ոչ սպանդանոցային մորթի արդյունքում ստացված կենդանական ծագման ցանկացած հումքի և մթերքի իրացումը։ Նոր կարգավորման համաձայն՝ հայտնաբերելու դեպքում ամբողջ խմբաքանակն առգրավվելու և ոչնչացվելու է։
Շիրակի մարզի մսագործներն ու մսավաճառներն այսօր դուրս էին եկել մարզպետարանի շենքի դիմաց ակցիայի։ Մսագործները բողոքում են, որ մարզում չկան բավարար թվով և պայմաններով սպանդանոցներ։ Հարց են բարձրացնում՝ նման իրավիճակում ինչպե՞ս է Կառավարությունը պարտադիր դարձնում սպանդանոցային մորթը։
Սննդամթերքի անվտանգության տեսչական մարմնի պաշտոնական կայքում Շիրակի մարզում գործող 5 սպանդանոցի հասցե է նշված։ Դրանք տեղակայված են Բանդիվան, Արդենիս, Աշոցք, Ձորակապ, Հայկաձոր գյուղերում։ Մսավաճառները վստահեցնում են, որ եղածը բավարար չէ։
ՍԱՏՄ իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանը Factor TV-ին փոխանցեց, որ օրենսդրական նոր կարգավորումից հետո տեսչական մարմինը սովորական ընթացակարգերով շարունակելու է վերահսկողություն իրականացնել։
Երեկ Արմավիրի մարզի բնակիչներն էին բողոքի ակցիայի դուրս եկել, իսկ նախորդ օրը Արարատի մարզի ֆերմերներն էին բողոքում պարտադիր սպանդանոցային մորթի պահանջի դեմ՝ սպառնալով փակել Երևան-Արտաշատ մայրուղին։
Մանրամասները՝ տեսանյութում։
Անի Թամրազյան
