Վաշինգտոնը շարունակում է համագործակցել Բաքվի հետ՝ կոչ անելով ձգտել կայուն խաղաղության Երևանի հետ

Վաշինգտոնը շարունակում է համագործակցել Բաքվի հետ՝ կոչ անելով կայուն խաղաղության ձգտել Երևանի հետ, այս մասին հերթական ճեպազրույցի ժամանակ հայտարարել է ԱՄՆ Պետդեպարտամենտի խոսնակ Մեթյու Միլլերը՝ մեկնաբանելով ԱՄՆ պետքարտուղարի օգնական Ջեյմս Օ՛Բրայանի այցը Բաքու։
«Մեզ անհանգստացրել են լրագրողներին կալանավորելու վերջին միտումները։ Մենք շարունակում ենք կոչ անել նրանց հարգել մարդու իրավունքները և հիմնարար ազատությունները, ինչի մասին ես էլի եմ խոսել այս ամբիոնից: Եվ մենք նաև շարունակում ենք համագործակցել նրանց հետ՝ կոչ անելով ձգտել կայուն խաղաղություն Հայաստանի հետ, և սա կշարունակի մնալ մեր դիվանագիտական ներգրավվածության առանցքում»,-ասել է ամերիկացի պաշտոնյան։
Միլլերը նաև նշել է, որ եթե Վաշինգտոնը խզի հարաբերություններն Ադրբեջանի հետ, դա կհակասի տարածաշրջանում խաղաղության ու անվտանգության շահերին։
«Մենք երբեք չենք ասել, որ չենք պատրաստվում շարունակել մեր հարաբերությունները Ադրբեջանի հետ։ Դա կհակասի մեր՝ Ամերիկայի Միացյալ Նահանգների շահերին։ Կարծում ենք, որ եթե մենք պարզապես դադարեցնենք մեր դիվանագիտական բոլոր հարաբերությունները Ադրբեջանի հետ, դա կհակասի տարածաշրջանում խաղաղության և անվտանգության շահերին: Մենք շարունակում ենք անմիջականորեն համագործակցել ինչպես Ադրբեջանի, այնպես էլ Հայաստանի հետ, որպեսզի հստակեցնենք, օրինակ, Ադրբեջանի դեպքում, թե որտեղ ունենք մտահոգություններ»,-ասել է Միլլերը։

Հավելենք, որ այսօր Ջեյմս Օ՛Բրայանը կայցելի Բաքու, որտեղ հանդիպումներ կունենա ադրբեջանցի պաշտոնյաների հետ։ Նախատեսվում են քննարկումներ երկկողմ հարաբերությունների ամրապնդման, Ադրբեջանի և Հայաստանի միջև խաղաղությանն աջակցելու վերաբերյալ։