01.04.2026 | 23:17
ԵՄ առաքելության գործունեությունը կարևոր է Հայաստանի քաղաքացիների համար. ՀՀ նախագահն ընդունել է Սատու Կոյվուին
Կոռուպցիայի մասին՝ հումորով․ «Մեդիալաբ»-ի կոմիքսապատումի ու անիմացիոն մուլտերի շնորհանդեսը. ՏԵՍԱՆՅՈՒԹ
Հասարակություն
05.12.2023 | 21:59
«Հոդված 3» ակումբում այսօր շնորհանդես էր, որտեղ ներկայացվեցին «Մեդիալաբ»-ի՝ «Սատիրան ընդդեմ կոռուպցիայի» ծրագրի շրջանակում ստեղծված 8 կարճ անիմացիոն մուլտերը և «8 պատմություն կոռուպցիայի մասին» կոմիքսներից բաղկացած պատկերագիրքը։ «Մեդիալաբ»-ի համահիմնադիր և գլխավոր ծաղրանկարիչ Վահե Ներսեսյանն ասում է՝ անիմացիոն մուլտերի և կոմիքսների պատմություններն իրական կյանքից են վերցվել։
Գիրքը և մուլտերը ոչ միայն կոռուպցիոն երևույթներն են հումորով ներկայացնում, այլև, ըստ հեղինակների, խնդիրների մասին հանրությանն իրազեկելու այլընտրանքային տարբերակ են։
«Մեդիալաբ»-ի համահիմնադիր Մարիաննա Գրիգորյանի խոսքով՝ միջոցառումը կազմակերպվել է կոռուպցիայի կանխարգելման միջազգային պայքարի օրվան՝ դեկտեմբերի 9-ին ընդառաջ։ 14 տարի առաջ այդ օրն է լրատվամիջոցը սկսել ծաղրանկարներ հրապարակել, իսկ առաջին ծաղրանկարը հենց կոռուպցիայի մասին էր։
«8 պատմություն կոռուպցիայի մասին» կոմիքսներից բաղկացած պատկերագիրքը կտրամադրվի տարբեր հասարակական կազմակերպությունների և կրթական հաստատությունների։ Արդեն իսկ մարզային այցեր են կատարվել երիտասարդական կենտրոններ, որտեղ ներկայացվել են մուլտերն ու գիրքը, իսկ «Մեդիալաբ»-ի կոմիքսները, գրաֆիկ նովելները և պատմություններն ամփոփվում են comics.am կայքում։
«Սատիրան ընդդեմ կոռուպցիայի» նախագիծն իրականացվել է ԱՄՆ Միջազգային զարգացման գործակալության «Հայաստանի բարեվարքություն» ծրագրի շրջանակում։ Ծրագրի ղեկավար Բարբարա Ջեյմսը ողջունեց կատարված աշխատանքը և կարևորեց կոռուպցիայի դեմ պայքարը։
Մանրամասները՝ տեսանյութում։
Անի Թամրազյան
