06.10.2026 | 21:45
Հայկ Սարգսյանը և Ավետիք Օրդյանը հեռացվել են «Քաղաքացիական պայմանագիր» կուսակցությունից
Լարված իրավիճակ՝ Ալավերդու ավագանու նիստում․ ավագանին անվստահություն հայտնեց գործող քաղաքապետ Արկադի Թամազյանին
Քաղաքականություն
05.12.2023 | 12:26
Ալավերդի համայնքի ավագանին այսօր անվստահություն հայտնեց համայնքի ղեկավար Արկադի Թամազյանին։ Նոր համայնքապետ ընտրվեց ավագանու ՔՊ խմբակցության ղեկավար, Շնողի նախկին համայնքապետ Դավիթ Ղումաշյանը։ Թամազյանի հեռանալու հարցին կողմ քվեարկեցին ավագանու 27 անդամից 14-ը։
Արկադի Թամազյանը հայտարարեց, որ նիստը մեկնարկել է օրենքի խախտմամբ։ Նիստի ընթացքում լարված իրավիճակ ստեղծվեց դահլիճում և քաշքշուկ եղավ, ոստիկանները տարածքից հեռացրին «Ապրելու երկիր» կուսակցության համահիմնադիր Մեսրոպ Առաքելյանին և Արկադի Թամազյանին։
Հիշեցնենք՝ 2022-ի սեպտեմբերի 25-ին Ալավերդիում անցկացված ընտրություններին ավագանու հավասար՝ 13-ական մանդատ էին ստացել «Քաղաքացիական պայմանագիր»-ը և «Ապրելու երկիր»-ը՝ չհաղթահարելով 50 տոկոսի շեմը: «Ապրելու երկիր»-ը կոալիցիա էր կազմել ընդամենը մեկ մանդատ ստացած «Հայ ազգային կոնգրես կուսակցության» հետ, և ավագանին քաղաքապետ էր ընտրել «Ապրելու երկր»-ի ներկայացուցիչ Արկադի Թամազյանին։
Այս տարվա հուլիսի 28-ից սկսած ՔՊ խմբակցությունը՝ չմասնակցելով ավագանու նիստերին, քվորում չէր ապահովում և տապալում էր դրանք։ ՔՊ-ի նախաձեռնությամբ այսօր՝ դեկտեմբերի 5-ին, Ալավերդի համայնքի ղեկավարին անվստահություն հայտնելու հարցով ավագանու նիստ էր հրավիրվել։
