Թմրանյութ՝ օնլայն․ ՔԿ-ն խոսում է հանցավոր խումբ բացահայտելու մասին, մարդիկ՝ չարիքի՝ դպրոց հասնելու․ ՏԵՍԱՆՅՈՒԹ   

Տելեգրամյան տարբեր ալիքների հասցեներ կարելի է դաջված տեսնել ամեն քայլափոխի․ դրանց թիվը գնալով ավելանում է քաղաքի շենքերի, ավտոտնակների, գետնանցումների պատերին և այլուր։ Թմրավաճառները համացանցի հնարավորություններն օգտագործելով՝ հաճախ հենց այսպես են իրենց արգելված ապրանքն իրացնում և անանուն մնում։

Այս տարվա միայն առաջին եռամսյակում թմրամիջոցների ապօրինի շրջանառության ավելի քան 300 դեպք է արձանագրվել։

Այսօր ՀՀ Քննչական կոմիտեն հայտնեց, որ բացահայտվել է 2019-2021թթ. ընթացքում թմրամիջոցների ապօրինի շրջանառությամբ զբաղվող հանցավոր խումբ։ Դրանում ներգրավված անդամներից 4-ի ինքնությունը բացահայտվել է, որոնցից 3-ին ներկայացվել են մեղադրանքներ:

Այսպիսով՝ Կոտայքի մարզի Առինջ գյուղի 24-ամյա բնակիչը, մեկ անձի հետ նախնական համաձայնությամբ, վերջինիս կողմից Տելեգրամ հավելվածում ստեղծված «Ismoke», «Ismoke420» և «Marc Emery Market» առցանց խանութ-հարթակներով զբաղվել են առանձնապես խոշոր չափերով թմրամիջոցների շրջանառությամբ՝ դրանում ներգրավելով նաև այլ հանցակիցների, կատարել դերաբաշխում:

Պարզվել է հանցավոր շղթայում ներգրավված ևս երկու մասնակցի ինքնությունը, որոնցից մեկը Երևանի 25-ամյա բնակիչ է, մյուսը՝ Երևանի 27-ամյա բնակիչ։

Հանցավոր խումբը կատարել է թմրանյութերի տեղափոխում, ըստ քաշերի առանձնացում, փաթեթավորում և ՀՀ տարածքում տեղադրում, թմրամիջոցների գտնվելու վայրերի լուսանկարահանում և ծրագրային հավելվածի միջոցով դրանց գտնվելու վայրերի կոորդինատների նշում, որի համար, թմրամիջոցների վաճառքից ստացված գումարներից որպես իրենց մասնաբաժին, յուրաքանչյուր տեղադրման համար ստացել են գումար:

Մինչ քաղաքացիներն ահազանգում են, որ թմրամիջոցների օգտագործումը տարածում է գտնում նաև դպրոցահասակների շրջանում, թմրավաճառները փորձում են նորագույն տեխնոլոգիաներն օգտագործելով՝ հնարավորինս աննկատ գործել։ Վերջին դեպքով, ըստ ՔԿ-ի, շուրջ 60 մլն դրամի հանցավոր ծագումը թաքցնելու նպատակով, այն փոխանցվել է տարբեր անձանց անուններով գրանցված տարատեսակ էլեկտրոնային դրամապանակներին։

Երեք անձանց մասով նախաքննությունն ավարտվել է։ Հանձավոր խմբի մյուս անդամների մասով նախաքննությունը շարունակվում է:

Մանրամասները՝ տեսանյութում։

Անի Թամրազյան