Քաղաքականություն
01.12.2023 | 12:54
Ադրբեջանի արտաքին գործերի նախարար Ջեյհուն Բայրամովը Սկոպյեում ԵԱՀԿ 30-րդ նախարարական խորհրդի շրջանակներում հանդիպել է ԵԱՀԿ գլխավոր քարտուղար Հելգա Շմիդի հետ։
Ադրբեջանի ԱԳՆ հաղորդմամբ՝ hանդիպման ընթացքում մտքերի փոխանակություն է տեղի ունեցել Ադրբեջան-ԵԱՀԿ երկկողմ համագործակցության օրակարգի հիմնական ուղղությունների, ներկայումս ԵԱՀԿ-ի առջև ծառացած մարտահրավերների, ինչպես նաև տարածաշրջանային և միջազգային անվտանգության հարցերի շուրջ։
Բայրամովը նշել է միջազգային իրավունքի հիմնական դրույթները հարգելու համար բազմակողմ հարթակների, այդ թվում՝ ԵԱՀԿ-ի կողմից առավել արդյունավետ մոտեցման կարևորությունը, ներառյալ այնպիսի հիմնարար սկզբունքներ, ինչպիսիք են տարածքային ամբողջականությունը և ինքնիշխանությունը: Հանդիպմանը քննարկվել են այն իրողությունները, որոնք ձևավորվել են տարածաշրջանում Բաքվի կողմից Արցախի դեմ իրականացված ռազմական ագրեսիայի ու հայերի էթնիկ զտումից հետո։ «Նշվել է երկակի ստանդարտների կիրառման անընդունելիությունը և միջազգային իրավունքի այնպիսի հիմնարար սկզբունքների նկատմամբ ընտրովի մոտեցումը, ինչպիսին տարածքային ամբողջականության և ինքնիշխանության վերականգնումն է»,- ասված է հաղորդագրության մեջ։
Բայրամովը հայտարարել է , թե Արցախի հայերի բռնի տեղահանման ու էթնիկ զտման պատասխանատուն Հայաստանն է։
«Մեր տարածքներից հայ բնակիչների հեռանալու պատասխանատվությունը կրում են Հայաստանը և նրան ենթակա անջատողական ռեժիմը»,-ասել է Բայրամովը՝ պնդելով, թե ԼՂ խաղաղ բնակչության նկատմամբ բռնություն չի գործադրվել։
