Հաղորդում հանցագործության մասին․ «Զվարթնոց» օդանավակայանում ԱԱԾ-ն փաստաբան Նարեկ Ալոյանին թույլ չի տալիս տեսակցել արգելանքի վերցված անձին

Փաստաբան Նարեկ Ալոյանն ահազանգում է․ արդեն երկու ժամ է՝ «Զվարթնոց» օդանավակայանում ԱԱԾ սահմանապահ ծառայողները թույլ չեն տալիս տեսակցել անձին, որն արգելանքի է վերցված։

«Այսօր ժամը 11։20-ի սահմաններում մոտեցել եմ «Զվարթնոց» օդանավակայանի սահմանապահ ծառայողներին, նրանց կողմից դեռևս ժամը 04։40-ին արգելանքի վերցված Ս.Լ.-ին փաստաբանական օգնություն տրամադրելու նպատակով։

Նկատի ունենալով, որ իմ մուտքը /հաղորդակցումը/ Ս.Լ.-ի հետ չի թույլատրվում, դեպքի մասին իմ 044-44-44-08 հեռախոսահամարից հետևյալ ժամերին ահազանգել եմ հետևյալ կառույցներին.

ՄԻՊ (116) – 11:33, 12:00, 12:25,

ԱԱԾ Սահմանապահ զորքերի թեժ գիծ (015-20-20-20) – 12:03,

ԱԱԾ թեժ գիծ (191) – 12:45, ինչի արդյունքում ԱԱԾ-ի կողմից իմ մուտքը վստահորդիս մոտ դեռևս չի թույլատրվել։

Կարծում եմ, որ նշված արարքը պարունակում է ՀՀ քրեական օրենսգրքի 491-րդ հոդվածով նախատեսված հանցագործության առերևույթ հատկանիշներ (փաստաբանի լիազորությունների իրականացումը խոչընդոտելը), ուստի՝ տալիս եմ սույն հաղորդումը հանցագործության մասին»,-  նշում է Նարեկ Ալոյանը։

Factor.am-ի տեղեկություններով՝  արգելանքի վերցվածը կասկածվում է կեղծ վիզայով ԱՄՆ մեկնելու փորձ կատարելու մեջ։ Փաստացի, լրացել է նրան արգելանք տակ պահելու 6 ժամը, սակայն նրան, ո՛չ ազատ են արձակում, ո՛չ էլ հնարավորություն են տալիս փաստաբանական օգնություն ստանալու։

Նարեկ Ալոյանը մեզ հետ զրուցում ասաց, որ իր մուտքը և հաղորդակցությունը ձերբակալվածի մոտ թույլ չեն տալիս՝ պատճառաբանելով, թե նրա հետ աշխատանքներ են տանում։ Փաստաբանը, սակայն, պնդում է, որ ինչ բնույթի աշխատանք էլ տարվելիս լինի անձի հետ, նրա պաշտպանը կարող է մասնակից լինել այդ գործընթացին։

Արաքս Մամուլյան