Փաշինյանը հստակեցրել է՝ չի ցանկանում Հայաստանը լիովին կախված լինի Ռուսաստանից․ԱՄՆ պետքարտուղարի տեղակալ
Քաղաքականություն
28.11.2023 | 12:42![](https://factor.am/wp-content/uploads/2023/11/o-brien.jpg)
ԱՄՆ պետքարտուղարի Եվրոպայի ու Եվրասիայի հարցերով տեղակալ Ջեյմս Օ՛ Բրայենը երեկվա ճեպազրույցում անդրադարձել է Եվրոպական խաղաղության հիմնադրամի միջոցով Հայաստանի հետ համագործակցության հարցին, խաղաղության համաձայնագրի հեռանկարին։
«Հայաստանի վերաբերյալ Եվրոպական խաղաղության հիմնադրամի վերաբերյալ ցանկացած քննարկում կթողնեմ ԵՄ իմ գործընկերներին։ Ես կասեի, որ վարչապետ Փաշինյանը շատ համարձակ է․ նա հասկացրել է, որ ցանկանում է Հայաստանն առաջ գնա սահմանների բացման և Արևմուտքի հետ հարաբերությունների բացման հարցում, որ չի ցանկանում Հայաստանը լիովին կախված լինի Ռուսաստանից այնպես, ինչպես նախկին առաջնորդները ձգտել են, որ դա լինի։ Եվ նա ձեռնարկել է մի շարք բարեփոխումներ, որոնք պետք է շատ ոգևորիչ լինեն Հայաստանի քաղաքացիների համար, քանի որ նրանք ձգտում են պահպանել այնպիսի արագ տնտեսական աճ, որը եղել է վերջին կամ երկու տարվա ընթացքում»,-ասել է պետքարտուղարի տեղակալը։
«Եվ ես կարծում եմ, որ վարչապետ Փաշինյանը նաև համարձակ է Ադրբեջանի հետ խաղաղության համաձայնագրի հարցում՝ որպես միջոց, որը թույլ կտա Հայաստանին կենտրոնանալ իր տնտեսական զարգացման վրա, կառուցել իր անվտանգային հարաբերությունները և ընդլայնել առևտուրը Կենտրոնական Ասիայից մինչև Թուրքիա, ինչը մենք կցանկանայինք տեսնել»։ Օ՛ Բրայենը նաև ողջունել է Հայաստանին աջակցող ցանկացած օգնության փաթեթ։
«Այնպես որ՝ Հայաստանին աջակցող ցանկացած փաթեթ ողջունելի է, թե ինչ տարբերակ ԵՄ-ն կընտրի՝ իր գործն է: Բայց մենք հանձնառու ենք աշխատել մեր եվրոպացի գործընկերների և Հայաստանի կառավարության հետ՝ տեսնելու, որ Հայաստանի ժողովուրդը կարող է օգուտ քաղել Փաշինյանի կառավարության ձեռնարկած բարեփոխումների քաղաքականությունից»։