Հասարակություն
24.11.2023 | 12:02
Նախկին ոստիկանապետ Վլադիմիր Գասպարյանի գործով դատական նիստին այսօր դպրոցականներ են եկել, ինչը բարկացրել է Գասպարյանին: Երեխաների` նիստին մասնակցելու մասին պարզ դարձավ մինչև նիստի մեկնարկը:
«Փոքրիկներին ինչո՞ւ եք բերում, մեր երկրի բարդա՞կը ցույց տաք», «Ես դեմ եմ, երեխեքին մի փչացրեք», «Դպրոցականներին բերում են, որ ասեն` տեսեք` ինչ է լինում ապագայում գեներալների հետ, «Երեխուն սենց չեն դաստիարակում», «Հիմա էլ ապագա սերնդի մո՞տ են վարկաբեկում»,- պարբերաբար բարկացած կրկնում էր Գասպարյանը:
Նիստի մեկնարկին Գասպարյանի պաշտպան Էրիկ Ալեքսանյանը նշեց, որ դատական նիստին իրավունք ունեն մասնակցել 16 տարին լրացած անձինք, ինչպես նաև 16 տարին չլրացած այլ անձինք` դատարանի թույլտվությամբ ու հետաքրքվեց, թե ինչ հատուկ պայմանների առկայությամբ պայմանավորված է որոշվել, որ դպրոցականները մասնակցեն այս նիստին: Ալեքսանյանը հիշեցրեց, որ այս գործով մեղադրյալի աթոռին սպայական բարձր կոչում ունեցող անձինք են, այդ թվում` գեներալի կոչմամբ և նշեց որ իր կարծիքով` նպատակահարմար չէ, որ դպրոցականները տեսնեն, որ ամբաստանյալի աթոռին բարձր սպայական կոչում ունեցող անձինք են նստած:
Ըստ պաշտպանական կողմի` թեև այս գործով ապացուցված չէ որևէ մեկի մեղքը և գործի քննության ընթացքում մշտապես հարգվել է անմեղության կանխավարկածը` երեխաները կարող են ճիշտ չընկալել ու ճիշտ հետևությունների չհանգել:
Հետո նիստն ընդմիջվեց և Վլադիմիր Գասպարյանի համար շտապօգնություն հրավիրվեց դատարան, քանի որ Գասպարյանը հայտարարել էր, որ ինքնազգացողությունը լավ չէ:
Արաքս Մամուլյան
