«Մի´ լացի, Աշխեն». առևտրականները գետնին թափեցին սեփական ապրանքը, անցորդները հավաքեցին, ԵԱՍՄ-ն տարավ. ՏԵՍԱՆՅՈՒԹ

Քաղաքային իշխանությանը դեռ չի հաջողվում արմատախիլ անել բացօթյա ապօրինի առևտուրը։ Քաղաքապետարանի և թաղապետարանների աշխատակիցները պարբերաբար շրջայց են կատարում, զգուշացումից հետո առևտրականները հավաքում են մթերքը, բայց սովորաբար շատ չանցած՝ պատկերը նույնն է։ 

Այսօր քաղաքապետարանի առևտրի և ծառայությունների վարչությունը ոստիկանության հետ համատեղ ստուգայց էր կազմակերպել Մաշտոցի պողոտայում։ Օրենքին չհետևող քաղաքացիների համար գործող կարգավորումներով նախատեսված է տուգանք՝ 70-ից 100 հազար, կրկնվելու դեպքում՝ 150-200 հազար դրամ։ Ստուգայցերի ընթացքում թեև տուգանքի արձանագրություններ կազմվում են, սակայն շատերն այդպես էլ չեն վճարում։ Վերջին կարգավորումներով՝ փողոցում վաճառվող ապրանքը նաև առգրավվում է։ 

Այսօր, երբ քաղաքապետարանի աշխատակիցները մոտեցան ապօրինի առևտուր իրականացնողներին և ասացին, որ առգրավում են ապրանքը, վերջինները խնդրեցին չտանել՝ խոստանալով փողոցից հավաքել այն։ Ասացին՝ վարձով են բնակվում, ապրուստի միակ միջոցն է, բայց քաղաքապետարանի աշխատակիցները պնդեցին, որ տանելու են, քանի որ շատ անգամներ են զգուշացրել, որ օրենք են խախտում, չի թույլատրվում փողոցում վաճառել։ 

Առևտրականները գետնին թափեցին ապրանքը, որպեսզի վարչության անդամները չառգրավեն։ Պողոտայով անցնող քաղաքացիները հավաքեցին թափված ապրանքը․  առևտրի և ծառայությունների վարչությունն առգրավեց մի մասը, իսկ ոչ պիտանի ապրանքը ԵԱՍՄ աշխատակիցները տարան։

Մանրամասները՝ տեսանյութում։

Արփի Հակոբյան