Քաղաքականություն
23.11.2023 | 18:05
Հայաստանը չի արգելափակել ՀԱՊԿ գագաթնաժողովի ոչ մի որոշում, այս մասին լրագրողներին ասել է Բելառուսի Անվտանգության խորհրդի պետքարտուղար Ալեքսանդր Վոլֆովիչը, փոխանցում է բելառուսական Բելտա գործակալությունը։
«Ոչ մի որոշում չի արգելափակվել։ Բելառուսի արտաքին գործերի և Հայաստանի արտաքին գործերի նախարարությունները համաձայնեցրել են բոլոր որոշումները (փաստաթղթերը, որոնք պետությունների ղեկավարների մասնակցությամբ ներկայացվել են գագաթնաժողովին), հայտարարությունները։ Սա ևս խոսում է փոխըմբռնման մասին, այդ թվում՝ հայկական կողմի հետ՝ լուծելու այն հարցերը, որոնք ներկայումս դրված են կազմակերպության վրա»,- ասել է Ալեքսանդր Վոլֆովիչը։
Այս առնչությամբ ՀՀ ԱԳՆ-ն մեկնաբանություն չի տարածել։
Պատասխանելով հարցին, թե որքան զգայուն է ՀԱՊԿ-ի համար գագաթնաժողովում հայկական կողմի բացակայությունը, Ալեքսանդր Վոլֆովիչն ասել է․
«Իհարկե, ցանկալի կլիներ, որպեսզի այսօր բոլոր կողմերը ներկա լինեին՝ և՛ պատվիրակությունները, և՛ պետության ղեկավարները։ Սակայն ամենակարևորն այն է, որ հայկական կողմը համաձայնեցրել է բոլոր որոշումները։ Բայց կան օբյեկտիվ և սուբյեկտիվ պատճառներ, ըստ ամենայնի, այդ պատճառով էլ հայ գործընկերները որոշել են այսօր չժամանել Մինսկ»։
Սրա հետ մեկտեղ Բելառուսի Անվտանգության խորհրդի պետքարտուղարը վստահ է, որ Հայաստանը ՀԱՊԿ-ից դուրս գալու ցանկություն չունի։ «Դա սխալ է, դա չի լինի առաջին հերթին ի շահ Հայաստանի ժողովրդի և երկրի», – ասել է նա։
