23.06.2026 | 00:27
Ամենամեծ էկրանով ստադիոնը, չսպասված երկրպագուներ. ԱԱ-2026-ի Բելգիա-Իրան խաղը` Factor TV-ի աչքերով
Հայաստանը Մարգարայի անցակետը զինում է խորը զննման սարքավորումներով․ 168 մլն դրամ կծախսվի
Քաղաքականություն
23.11.2023 | 08:16
Հայ-թուրքական սահմանին գտնվող «Մարգարա» մաքսային սահմանային նոր անցման կետը համապատասխան տեխնիկական միջոցներով՝ ռենտգենյան զննող և ֆիզիկական անձանց խորը զննման սարքավորումներով վերազինելու համար, Պետական եկամուտների կոմիտեն ծախսելու է 168 մլն դրամ։
Այս մասին Factor.am-ը տեղեկանում է 2023 թվականի բյուջեում իրականացվող վերաբաշխման փաստաթղթերից։
Մարգարայի անցակետը բացելու խոսակցություններն ակտիվացան 44-օրյա պատերազմից հետո, երբ առաջ եկավ հայ-թուրքական հարաբերությունների հաշտեցումը։ Երևանն ու Անկարան հատուկ բանագնացներ նշանակեցին։
Բանագնացների մի քանի հանդիպումից հետո Հայաստան–Թուրքիա հարաբերությունների կարգավորման բանակցություններում ՀՀ հատուկ ներկայացուցիչ Ռուբեն Ռուբինյանն այս տարվա ապրիլի 11-ին հայտարարել էր․ «Կա պայմանավորվածություն, որ հայ-թուրքական ցամաքային սահմանն ամռան սկզբին պետք է բացվի երրորդ երկրների քաղաքացիների և դիվանագիտական անձնագիր ունեցող անձանց համար»։
Ամռան ընթացքում, սակայն, Մարգարայի անցակետը չբացվեց։
Հիշեցնենք, որ հայ-թուրքական սահմանի՝ Մարգարայի ցամաքային անցակետը 30 տարվա մեջ առաջին անգամ գործարկվեց միայն փետրվարին, երբ Հայաստանը մարդասիրական օգնություն և փրկարարներ ուղարկեց երկրաշարժից տուժած Թուրքիա։
Այժմ հայ-թուրքական հարաբերությունների կարգավորման բանակցային գործընթացի մասին ոչինչ հայտնի չէ, հատուկ ներկայացուցիչների հանդիպման մասին Երևանն ու Անկարան լռում են։
