Քաղաքականություն
20.11.2023 | 15:39
ՌԴ նախագահի մամուլի քարտուղար Դմիտրի Պեսկովը չի մեկնաբանել Հայաստանի վարչապետ Նիկոլ Փաշինյանի հայտարարությունները Բաքվի կողմից առաջ մղվող «Արևմտյան Ադրբեջան» հայեցակարգի և ՀՀ-ին ներկայացվող տարածքային պահանջների վերաբերյալ, գրում է ՏԱՍՍ-ը։
«Ցավոք, ոչինչ չեմ կարող ասել, քանի որ պետական մակարդակով Ադրբեջանի նման հայտարարություններին ծանոթ չեմ։ Մենք լսել ենք բոլորովին այլ հայտարարություններ երկրի ղեկավարությունից, Ադրբեջանի ղեկավարությունից, որոնցում հենց խոսվում է մի փուլի ավարտի և խաղաղության պայմանագրի կնքմանը պատրաստ լինելու անհրաժեշտության մասին։ Հետևաբար, պարոն Փաշինյանի հայտարարության այս հատվածի մասին կոնկրետ որևէ բան չեմ կարող ասել», -ասել է Պեսկովը։
Հավելենք, որ Նիկոլ Փաշինյանը ԵԱՀԿ Խորհրդարանական վեհաժողովի երևանյան նիստում ունեցած ելույթում հայտարարել էր, որ Ադրբեջանի որոշ քայլերից տպավորություն է ստեղծվում, որ նա պատրաստվում է նոր ռազմական գործողությունների Հայաստանի դեմ։ Նա ասել էր, որ Ադրբեջանում պաշտոնական մակարդակով Հայաստանի Հանրապետությունը սկսել են կոչել «Արևմտյան Ադրբեջան», և դա ակտիվորեն ուսուցանում են դպրոցներում, բուհերում ու տարածում ԶԼՄ-ներում։
Էմմա Չոբանյան
