Կարգախոսներ կան, մեխանիզմներ՝ ոչ․ նոր կարգավիճակը չի երաշխավորում, որ հուշարձանները չեն վնասվի. ՏԵՍԱՆՅՈՒԹ

Օրեր առաջ Մշակույթի նախարարության փորձագիտական հանձնաժողովը միաձայն կողմ է քվեարկել յոթ կառույցի՝ պատմության և մշակույթի անշարժ հուշարձանների ցուցակում ընդգրկելուն: Դրանց թվում են «Զվարթնոց» օդանավակայանի հին մասնաշենքը, «Ռոսիա» («Այրարատ») կինոթատրոնը, «Մոսկվա» կինոթատրոնի ամառային դահլիճը, «Հրազդան» մարզադաշտը, Երևանի մետրոպոլիտենի «Հանրապետության հրապարակ» կայարանը, Երևանի մետրոպոլիտենի «Երիտասարդական» կայարանը, «Գաֆեսճյան» արվեստի կենտրոնը (Կասկադ)։

Ուշագրավ է, որ այս առնչությամբ կառավարության որոշում դեռ չկա։ Մշակույթի նախարարությունը պետք է զգուշացնի հուշարձանների սեփականատերերին, համայնքների ղեկավարներին, տարածքային պետական մարմիններին և Կադաստրին՝ տվյալ հուշարձանների նոր կարգավիճակի մասին։ Նախարարությունը, սակայն, դեռևս մասնակի է իրականացնել այդ գործունեությունը։ Հետևաբար՝ երաշխիք չկա, որ մինչև կառավարության համապատասխան որոշումը հուշարձանները չեն աղճատվի։

Ճարտարապետ Արսեն Կարապետյանը Factor.am-ի հետ զրույցում պնդում է՝ անգամ կառավարության որոշումից հետո ոչ մի երաշխիք չկա, որ հուշարձանները չեն քանդի կամ չեն աղավաղի։ Նրա խոսքով՝ օրենքը բավական թերի է, հուշարձանների պահպանության վերաբերյալ կան կարգախոսներ, բայց հստակ մեխանիզմներ՝ ոչ։ ՀՀ մշակույթի նախարարության Պատմության և մշակույթի հուշարձանների պահպանության գործակալության պետ Արմեն Աբրոյանն էլ նշում է՝ պետք է նստել բանակցային սեղանի շուրջ և կայացնել որոշումներ՝ հօգուտ հուշարձանի և ի շահ հանրության։ Արսեն Կարապետյանը, սակայն, վստահ է՝ չի կարող լինել մեկ «դեղատոմս»՝ բոլոր հուշարձանների համար։

Մանրամասները՝ տեսանյութում։

Աննա Բաբաջանյան