Ատամնաբույժի ֆեյսբուքյան էջի հղում՝ դասագրքում. խնդրահարույց QR կոդի հետքերով․ ՏԵՍԱՆՅՈՒԹ

Ինչպես ճիշտ մաքրել ատամները․ 2-րդ դասարանի «Ես և շրջակա աշխարհը» առարկայի դասագրքում, ուսուցողական այս տեսաֆիլմի փոխարեն, QR կոդի հղումը տանում է «Բժիշկ Լենա Հակոբյան» ֆեյսբուքյան օգտատիրոջ գրառումներից մեկը։

Արտակ Գաբոյանը մեկն է ֆեյսբուքյան այն օգտատերերից, որը նկատել է խնդիրն ու բարձրաձայնել։ Ինչո՞ւ է 2-րդ դասարանցու դասագրքում դեպի ֆեյսբուքյան օգտատիրոջ էջ հղման QR կոդ տեղադրվում և ինչպե՞ս է ընտրվել այս գրառումը։

Չնայած Արտակ Գաբոյանը լավ մոտեցում է համարում դասագրքերում տեքստերին նաև մեդիաբովանդակություն ավելացնելը, բայց այստեղ խնդիր է տեսնում։ Գաբոյանի խոսքով՝ QR կոդի փոխարեն ավելի նպատակահարմար կարող է լինել կիրառել կարճացված հղումները, ինչպես, ըստ նրա, մաթեմատիկայի որոշ դասագրքերում է, որպեսզի երեխան ոչ թե սմարթֆոնն օգտագործի, այլ համակարգչով կարողանա հղումը հավաքել և տրված նյութը բացել։

Մի շարք օգտատերեր էլ իրենց գրառումներում մտահոգություն են հայտնում՝ գուցե դասագրքում նման հղումը թաքնված գովազդի՞ նպատակով է։ Factor TV-ն կապ հաստատեց  ատամնաբույժ Լենա Հակոբյանի հետ, որի գրառումը հայտնվել է դասագրքում։ Հակոբյանն ասում է՝ չնայած նոր է իմացել իր գրառման՝ դասագրքերում հայտնվելու մասին, այնուամենայնիվ, դրանում ոչ մի խնդիր չի տեսնում։

ԿԳՄՍ նախարարության Հանրակրթության վարչության պետ Թամարա Սարգսյանի խոսքով՝ գրքի հեղինակների կողմից վրիպակ է եղել, ֆեյսբուքյան էջի փոխարեն՝ պետք է տեղադրվեր յութուբյան հղում, ինչպես նույն էջում գտնվող երկրորդ QR-ի դեպքում է, որից բացվում է ՅՈՒՆԻՍԵՖ-ի «Ինչպե՞ս ճիշտ լվանալ ձեռքերը» տեսաֆիլմը։ Հանրակրթության վարչության պետի խոսքով՝ եթե, ամեն դեպքում, հնարավոր չլինի QR-ը փոխել, այդ մեկը դասագրքից կհանվի։

Նոր չափորոշիչներով դասագրքերի մշակման գործընթացը մեկնարկել է այս տարի, և ըստ Սարգսյանի՝ յուրաքանչյուր ուսումնական տարվա սկզբին դրանց QR կոդերը վերանայվելու են նման անհամապատասխանություններից խուսափելու համար։

Հիշեցնենք՝ ուսումնական տարվա սկզբին բողոքի ու դժգոհության լայն ալիք էր բարձրացրել նաև Հայոց պատմության 7-րդ դասարանի դասագիրքը։ Քննարկման թեմա էր դարձել դասագրքի 80-րդ էջում տեղ գտած քարտեզը, որում Արցախի սահմաններն առանձնացված չեն․ այն Ադրբեջանի սահմաններում է գծանշված։

Մանրամասները՝ տեսանյութում։

Անի Թամրազյան