ԵՐԵՎԱՆԻ ԺԱՄԱՆԱԿՈՎ. Որքան շատ խոսի Քոչարյանը, այնքան կբացահայտի իր կատարած մեղքերի մեծագույն մասը․ Աշոտ Ադամյան. ՏԵՍԱՆՅՈՒԹ

«Իմ երազած երկիրը ոչ մի առնչություն և աղերս չունի Ռոբերտ Քոչարյանի պատկերացրած երկրի հետ։ Իմ երազած Հայաստանում այսպես էլ պետք է լիներ»,-Factor.am-ի «Երևանի ժամանակով» զրուցաշարի շրջանակում նշում է ռեժիսոր, դերասան Աշոտ Ադամյանը՝ անդրադառնալով Հայաստանի երկրորդ նախագահ Ռոբերտ Քոչարյանին մեղադրանք առաջադրելու փաստին։

Ինչ վերաբերում է Ռոբերտ Քոչարյանի վերջին հարցազրույցին և նրա այն պնդմանը, թե «Մարտի 1»-ի գործով իրեն առաջադրված մեղադրանքը ռումբ է՝ դրված մեր երկրի, մեր պետականության հիմքում, ռեժիսորը նկատում է․ «Սովորաբար, յուրաքանչյուր մարդ ի պաշտպանություն իրեն ասում է այն, ինչ թույլ է տալիս իր ուղեղի տարողությունը և վերաբերմունքը մարդ տեսակին, երկրին։ Նա եփել է այն ճաշը, որը կերել ենք երկու տասնամյակ։ Այսօր նրա խոսքերից կարող եմ առանձնացնել միայն այն, որ ասաց, թե պատրաստվում է դիմել իր դեմ հնչեցված երակարամյա «պայքար-պայքար» կոչնակով։ Ուրախ եմ, որ նա իր համար հարազատ է դարձնում այդ կոչնակը, թող պայքարի»։

Աշոտ Ադամյանի համոզմամբ՝ Ռոբերտ Քոչարյանը տարիներ առաջ սահմանադրական կարգի խախտմամբ է գրավել նախագահի աթոռը․ «Որքան շատ խոսի Քոչարյանը, այնքան կբացահայտի իր կատարած մեղքերի մեծագույն մասը»,- շեշտում է մեր զրուցակիցը։

Ռեժիսորը կողմ է, որ «Մարտի 1»-ի գործով Հայաստանի երրորդ նախագահ Սերժ Սարգսյանը ևս հարցաքննվի: «Երբ Սերժ Սարգսյանը եկավ Քոչարյանից հետո, հերոսանալու հնարավորություն ուներ, բայց միայն բարելավեց ավազակային խմբի գործունեությունը, բիզնեսմեններին դարձրեց օլիգարխ»,- ասում է նա։

Աշոտ Ադամյանը խոսում է նաև Երևանի ապագա քաղաքապետի որակների մասին։ Նրա խոսքով՝ Երևանը մեր փոքրիկ Հայաստանի մեգապոլիսն է, իսկ քաղաքապետն էլ փոքր ֆիգուր չէ․ «Հախուռն որոշումներ պետք չէ կայացնել, մեզ պետք է մեկը, ով կկարողանա խելքի բերել այս քաղաքը, կտառապի քաղաքի ցավերով, որ Հայաստանը չդարձնի Դուբայ․ մեզ պետք է Երևան»։

Մանրամասները՝ տեսանյութում։

Աննա Բաբաջանյան