Երվանդ Զախարյանի վերաբերյալ քրեական գործ է ուղարկվել դատարան․ ըստ մեղադրանքի՝ «Ավանգարդ Մոթորս» ՍՊԸ-ին օտարվել է պետական սեփականություն հանդիսացող հողատարածք

Երևանի նախկին քաղաքապետ Երվանդ Զախարյանի վերաբերյալ գործ է ուղարկվել Հակակոռուպցիոն քրեական դատարան։ Վերջինս, ըստ մեղադրանքի, Երևանի քաղաքապետ եղած ժամանակ, 2004 թվականի հունվարի 16-ին, առանց համապատասխան իրավական հիմքերի, որոշում է կայացրել «Ավանգարդ Մոթորս» ՍՊԸ-ին օտարել Երևանի քաղաքապետարանի հաշվեկշռում ընդգրկված, պետական սեփականություն հանդիսացող Երևան քաղաքի Սարալանջ փողոցի 1-ին հասցեում գտնվող 31.780 քմ հողամասը, որն էական վնաս է պատճառել հասարակության և պետության օրինական շահերին` անզգուշությամբ առաջացնելով ծանր հետևանքներ:

Նշենք, որ Երվանդ Զախարայանը Երևանի քաղաքապետ է եղել 2003 թվականի հուլիսի 1-ից մինչև 2009 թվականի մարտի 4-ը։ Մեղադրանքում նշվում է, որ Զախարյանը, ՀՀ հողային օրենսգրքով, «Երևան քաղաքում պետական կառավարման մասին» ՀՀ նախագահի` 06.05.1997թ. թիվ ՆՀ-727 հրամանագրով, ՀՀ կառավարության` 2002 թվականի հոկտեմբերի 3-ի թիվ 1788-Ն որոշմամբ հաստատված` Երևանի քաղաքապետարանի աշխատակազմի կանոնադրությամբ սահմանված դրույթների ուժով ի պաշտոնե պարտավոր լինելով պետական սեփականության հողերը տնօրինել և օգտագործել օրենսդրությամբ սահմանված կարգով, չարաշահել է իր պաշտոնեական լիազորությունները։

Մեղադրյալի աթոռին է նաև 2004 թվականին Երևանին քաղաքապետարանի աշխատակազմի անշարժ գույքի կառավարման վարչության պետ եղած Կարեն Դավթյանը։ Ըստ մեղադրանքի՝ վերջինս օժանդակել է Երվանդ Զախարյանին։

Երկու մեղադրյալի նկատմամբ էլ խափանման միջոց է ընտրվել բացակայելու արգելքը։ Գործը մակագրվել է դատավոր Գիվի Հովհաննիսյանին։

Արաքս Մամուլյան