12.03.2026 | 23:35
Վթար Երասխ-Երևան ավտոճանապարհին․ կան տուժածներ
Ենթադրյալ սեռական բռնության ենթարկված երեխայի լուսանկարը՝ սոցցանցում․ ինչպես են օգտատերերը «փրկում» զոհին. ՏԵՍԱՆՅՈՒԹ
Հասարակություն
15.11.2023 | 19:55
Երեխայի նկատմամբ սեռական բռնության հերթական դեպքի մասին օրերս Ֆեյսբուք սոցիալական կայքի որոշ օգտատերեր են ահազանգել իրենց էջերում։ Գրառումը լայնորեն տարածվել է սոցցանցում, ցավոք, զուգահեռ հրապարակվել են երեխայի լուսանկարները՝ հնարավորություն ընձեռելով նույնացնել բռնության ենթարկված երեխային։ Անչափահասի իրավունքների խախտման մասին բարձրաձայնել է Երեխաների իրավունքների պաշտպանության միջազգային փորձագետ, փաստաբան Դավիթ Թումասյանը։
Փաստաբանն ընդգծում է՝ նման պարագայում անչափահասը նոր հոգեկան տրավմայի է ենթարկվում։ Ըստ նրա՝ ցանկացած տեղեկատվություն, որը երեխային նույնականացնելու իրական հնարավորություն է ստեղծում, չպետք է դառնա լայն շրջանակներին հասանելի։
«Վորլդ Վիժն Հայաստան» կազմակերպության փորձագետ Աննա Սաֆարյանը ևս փաստում է՝ վերջին տարիներին համացանցում լրջագույն խնդիր է երեխաների անձնական տվյալների պաշտպանությունը։ Սաֆարյանի խոսքով՝ որպեսզի օնլայն հարթակներում երեխաները պաշտպանված լինեն, պետք է ոչ թե արդեն իսկ տեղի ունեցած դեպքերի հետևանքները վերացնել, այլ կանխարգելման հստակ մեխանիզմներ ներդնել։
ՆԳՆ լրատվական բաժնից Factor.am-ին փոխանցեցին, որ տեղյակ են համացանցում երեխայի նկատմամբ բռնության՝ մի շարք օգտատերերի կողմից տարածում գտած դեպքին, և այժմ տարվում են համապատասխան աշխատանքներ։
Քննչական կոմիտեի պաշտոնական վիճակագրության համաձայն՝ միայն այս տարվա առաջին կիսամյակում կոմիտեի վարույթում քննվել է անչափահասների նկատմամբ կատարված հանցագործությունների վերաբերյալ 699 քրեական վարույթ, որը 154-ով ավելին է 2022-ի ընթացքում քննված վարույթներից։
Երեխայի նկատմամբ սեռական բռնության վերջին աղմկահարուց դեպքն օգոստոսի 18-ին էր, երբ մոր կողմից երեխային բռնության ենթարկելու և մյուս երեխաներին մասնակից դարձնելու տեսանյութը դարձյալ լայնորեն տարածվել էր սոցցանցերում։ Այդ տեսանյութում ևս երեխաների դեմքերը տեսանելի են և հնարավոր էր նույնականացնել։
Մանրամասները՝ տեսանյութում։
Անի Թամրազյան
