Ցանկացած երկիր իրավունք ունի պաշտպանության ուժեր ունենալ․ Վրաստանի ԱԳ նախարարը՝ Փոթիով ՀՀ ուղարկված ֆրանսիական «Բաստիոն»-ների մասին

Վրաստանի ԱԳ նախարար Իլյա Դարչիաշվիլին վրացական «Առաջին ալիքին» տված հարցազրույցում անդրադարձել է տարածաշրջանում տիրող իրավիճակին, ինչպես նաև մամուլում տարածվող տեղեկություններին, որ վրացական տարածքով Հայաստան ֆրանսիական զրահամեքենաներ են ուղարկվել։

«Վրաստանը երկու երկրներին էլ հնարավորություն է տալիս հավասար պայմաններով օգտագործել մեր երկրի տարանցիկ գործառույթը՝ միաժամանակ կարողանալով օգտագործել մեր երկիրը տարանցման տեսանկյունից։ Ցանկանում եմ ընդգծել, որ հավասար պայմաններով։ Ցանկացած երկիր իրավունք ունի ունենալ պաշտպանության ուժեր, իսկ երբ խոսքը գնում է սովորական տեխնիկայի կամ միջազգային պայմանագրերով թույլատրված զինատեսակների մասին, ցանկացած երկիր իրավունք ունի դրանք ձեռք բերել։ Վրաստանը դիրքորոշումն այն է, որ երկու երկրներին էլ պետք է տալ հնարավորություն օգտագործելու տարանցիկ գործառույթը, որն ունի մեր երկիրը, ընդ որում՝ հավասար պայմաններով։ Ըստ այդմ՝ սա մեր պատասխանն է այդ հարցին և անհարկի ակնարկները տեղին չեն»,- ասել է Վրաստանի ԱԳ նախարարը։

Դարչիաշվիլին նաև նշել է, որ Թբիլիսին հստակ դիրքորոշում ունի «3+3 ձևաչափի նկատմամբ, չի մասնակցում դրան և չի մասնակցելու նաև ապագայում»։ Նա ասել է, որ Վրաստանը երկկողմ ձևաչափով շատ լավ, բարեկամական հարաբերություններ և համագործակցություն ունի հարևան երկրների՝ Թուրքիայի, Հայաստանի և Ադրբեջանի հետ։

Հավելենք, որ Վրաստանի Փոթիի նավահանգիստը շահագործող APM Terminals ընկերությունը «Ազատություն» ռադիոկայանի վրացական ծառայությանը հաստատել էր ֆրանսիական «Բաստիոն» զրահամեքենաների տարանցումը Հայաստան։

«Կոնկրետ տվյալ դեպքում բեռը ժամանել է ԵՄ երկրից՝ Ֆրանսիայից, և ուղարկվել է Հայաստան՝ երկիր, որի նկատմամբ պատժամիջոցներ չեն տարածվում։ Բացի այդ, Վրաստանի կառավարության կողմից հստակ ցուցումների և միջազգային կարգավորիչների կողմից սահմանված սահմանափակումների բացակայության դեպքում APM Terminals Poti-ն չի կարող անհիմն կերպով հրաժարվել բեռների ընդունումից, որոնք պատժամիջոցների տակ չեն»,- ասել էր Փոթի նավահանգիստը շահագործող ընկերությունը։

Ավելի վաղ էլ ադրբեջանական քարոզչական լրատվամիջոցները տեղեկություններ և լուսանկարներ էին հրապարակել՝ պնդումով, թե վրացական Փոթի է ժամանել Ֆրանսիայից «Բաստիոն» զրահատեխնիկայի խմբաքանակը, որը նախատեսված է Հայաստանի համար, որին ի պատասխան Ադրբեջանի ԱԳՆ-ն դատապարտող հայտարարություն էր տարածել։

Էմմա Չոբանյան