22.04.2026 | 23:30
ՀՀ տարածքում ավտոճանապարհները հիմնականում անցանելի են
Կրեմլն ափսոսում է, որ Նիկոլ Փաշինյանը չի մասնակցի ՀԱՊԿ գագաթնաժողովին․ Պեսկով
Քաղաքականություն
14.11.2023 | 13:57
ՌԴ նախագահի մամուլի քարտուղար Դմիտրի Պեսկովն ափսոսանք է հայտնում, որ ՀՀ վարչապետ Նիկոլ Փաշինյանը չի մասնակցի Հավաքական անվտանգության պայմանագրի կազմակերպության (ՀԱՊԿ) առաջիկա գագաթնաժողովին, որը տեղի է ունենալու նոյեմբերի 23-ին Մինսկում, գրում է ՏԱՍՍ-ը։
«Եթե դա իսկապես այդպես է, ապա մենք կարող ենք ափսոսանք հայտնել։ Մենք հասկանում ենք, որ յուրաքանչյուր կառավարության ղեկավար կամ պետության ղեկավար կարող է ունենալ իր միջոցառումներն աշխատանքային գրաֆիկում, իր հանգամանքները: Սակայն կարելի է միայն ափսոսանք հայտնել, որ քանի որ նման հանդիպումները հանդիսանում են շատ լավ առիթ կարծիքների փոխանակման համար»,-ասել է Պեսկովը։
Հիշեցնենք, որ բելառուսական կողմի նախաձեռնությամբ տեղի էր ունեցել վարչապետ Նիկոլ Փաշինյանի հեռախոսազրույցը Բելառուսի նախագահ Ալեքսանդր Լուկաշենկոյի հետ։ ՀՀ վարչապետի աշխատակազմի հաղորդմամբ՝ քննարկվել էին ՀԱՊԿ Հավաքական անվտանգության խորհրդի՝ նոյեմբերի 23-ին Բելառուսի մայրաքաղաք Մինսկում կայանալիք նիստի կազմակերպման հետ կապված հարցեր: Վարչապետ Փաշինյանը Բելառուսի նախագահին տեղեկացրել էր, որ չի կարողանա մասնակցել նիստին և հույս հայտնել, որ ՀԱՊԿ գործընկերներն ըմբռնումով կվերաբերվեն այդ որոշմանը:
Էմմա Չոբանյան
