Քաղաքականություն
10.11.2023 | 17:43
«Մենք բազմիցս ասել ենք, որ պատրաստ ենք Բրյուսելում եռակողմ հանդիպմանը։ Պլանավորված հանդիպում՝ առաջնորդների մակարդակով, հոկտեմբերի վերջին պետք է կայանար, և Հայաստանը պատրաստակամություն էր հայտնել գալ, սակայն, ցավոք, հանդիպումը տեղի չունեցավ։ Մենք հույս ունենք՝ ապագայում դա հնարավոր կլինի»,- այս մասին այսօր Բրյուսելում ընթացող «Հայաստանի ռազմավարական ապագան. ՀՀ-Եվրոպա» խորագրով համաժողովի ժամանակ հայտարարեց ՀՀ Անվտանգության խորհրդի քարտուղար Արմեն Գրիգորյանը։
Իր ելույթում ԱԽ քարտուղարը հիշեցրեց 2021 թվականի արտահերթ ընտրությունները, նշելով, որ հենց խաղաղության օրակարգով են մասնակցել դրանց և ստացել մանդատ՝ այդ օրակարգն իրականացնելու համար։
«Այս պահին ցանկանում ենք, որ Հայաստանի և Ադրբեջանի միջև սահմանը հստակեցվի, հրապարակային հաստատվի 29.800 կմ² ՀՀ-ն և 86.600 կմ² Ադրբեջանի հանրապետությունը։ Ապաշրջափակում տեղի ունենա չորս սկզբունքների՝ սուվերենության, իրավազորության, փոխադարձության և հավասարության հիման վրա։ Այս սկզբունքների շուրջ մենք պատրաստ ենք բանակցություններն ավարտին հասցնել, ինչպես նաև լուծել գոյություն ունեցող հումանիտար խնդիրները, որոնք այս պահին առկա են։ Կարևոր հարցերից մեկը նաև բոլոր գերիների վերադարձը և խաղաղության հաստատումն է։ Հայաստանը պատրաստ է այս օրակարգով գալ Բրյուսել, շարունակել բանակցությունները, հասնել վերջնական կետի և կնքել խաղաղության պայմանագիրը»,- նշեց Գրիգորյանը։
