Քաղաքականություն
10.11.2023 | 13:09
ԱՄՆ եվրոպական հրամանատարության հրավերով նոյեմբերի 1-3-ը ՀՀ պաշտպանության նախարարի 1-ին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանն այցելել էր Շտուտգարտում տեղակայված ԱՄՆ եվրոպական հրամանատարության կենտրոնակայան: Նոյեմբերի 3-ին տեղի է ունեցել հանդիպում ԱՄՆ եվրոպական հրամանատարության հրամանատարի տեղակալ, գեներալ-լեյտենանտ Սթիվեն Բաշամի հետ: Ամերիկյան կողմը X-ի էջում ՀՀ ԳՇ պետի այցը ամփոփող տեսանյութ է հրապարակել։
Տեսանյութում Էդվարդ Ասրյանը հայտարարում է, որ արևմտյան երկրները կենսական նշանակություն ունեն խաղաղության ու կայունության գործում։
«Եվ այս առնչությամբ մենք ցանկանում ենք ընդլայնված գործընկերություն ԱՄՆ-ի հետ»,- ասում է ՀՀ ԳՇ պետը։
Նշվում է, որ բանակցություններում քննարկվել են Հայաստանի զինված ուժերի արդիականացումը, զորավարժությունների հնարավորություններն ամերիկյան ուժերի հետ։
ԱՄՆ եվրոպական հրամանատարության բրիգադի գեներալ Բրիոնի Թերելն էլ հայտարարել է, որ սա նշանակալի իրադաձություն է իրենց և Հայաստանի համար։
«Մենք դրել ենք ուժեղ և ընդլայնված համագործակցության հիմքերը։ Վերապատրաստման վարժանքներն ու ռազմավարական քննարկումները մեծացնում են մեր ճանաչողությունը և ճանապարհ բացում ավելի ուժեղ գործընկերության համար»,- ասել է նա։
Տեսանյութում նաև խոսվում է այս տարի Հայաստանում անցկացված հայ-ամերիկյան «Արծիվ գործընկեր-2023» զորավարժությունների մասին խաղաղապահ առաքելության նախապատրաստության շրջանակում։
Էմմա Չոբանյան
