25.04.2026 | 13:30
Էդուարդ Սպերցյանը նշել է «Կրասնոդարի» ամենասկզբունքային մրցակիցներին
Ամերիկահայերի դեմ խտրական վերաբերմունքի համար Citigroup-ը 25,9 մլն դոլարով տուգանվել է
Քաղաքականություն
09.11.2023 | 13:09
ԱՄՆ-ում գործող Citibank-ը տարիներ շարունակ ապօրինի խտրական վերաբերմունք է դրսևորել ամերիկահայերի նկատմամբ՝ առանձնացնելով նրանց կրեդիտ քարտերի դիմումները՝ հիմնվելով նրանց ազգանվան վրա։ Այս մասին հայտնել է դաշնային կարգավորող մարմինը, գրում է CNN-ը։
Սպառողների ֆինանսական պաշտպանության բյուրոն՝ CFPB-ն, պարզել է, որ առնվազն 2015-ից մինչև 2021 թվականը ընկերությունը «թիրախավորել է» հայկական ծագմամբ անձանց։ «Citi-ն ամերիկահայերին վերաբերվում էր որպես հանցագործների, որոնք կարող են խարդախություն գործել», – պնդում է CFPB-ն:
Ըստ կարգավորող մարմնի՝ բանկը մյուսների համեմատ ավելի խիստ չափանիշներ է կիրառել ամերիկահայերի դիմումների նկատմամբ, անմիջապես մերժելով դրանք, արգելափակել հաշիվները և պահանջել լրացուցիչ տեղեկատվություն։ Citi-ն թիրախավորել է այն դիմողներին, որոնց ազգանուններում կա «-ian» և «-yan» վերջավորությունը։ Խտրականություն է դրսևորվել հատկապես Գլենդելում և Կալիֆորնիայի այլ բնակավայրերում: Այս խտրականությունը թաքցնելու համար ընկերությունն անգամ փաստաթղթեր է կեղծել:
CFPB-ն բանկին պարտավորեցրել է վճարել 25,9 միլիոն դոլար տուգանք և սպառողների փոխհատուցում:
«Ցավոք, Կալիֆոռնիայի որոշ հատվածներում գործող հայկական խարդախության լավ փաստագրված ցանցը խափանելու փորձի ժամանակ մի քանի աշխատակիցներ անթույլատրելի գործողություններ են կատարել։ Թեև մենք առաջնահերթություն ենք տալիս մեր բանկին և մեր հաճախորդներին խարդախությունից պաշտպանելուն, անընդունելի է վարկային որոշումները հիմնել ազգային ծագման վրա»,- CNN-ին ասել է Citi-ի խոսնակ Քերեն Քիրնսը: Նա հավելել է, որ որ ներքին հետաքննությունից հետո բանկը «համապատասխան գործողություններ» է ձեռնարկել ներգրավված անձանց նկատմամբ և քայլեր է ձեռնարկել, որպեսզի դա չկրկնվի:
Ըստ բյուրոյի՝ Citi-ի ղեկավարները «դավադրություն են կազմակերպել՝ թաքցնելու խտրականությունը»՝ խնդրելով աշխատակիցներին չքննարկել պրակտիկան գրավոր կամ ձայնագրվող հեռախոսային գծերով։
«Citi-ն հայերին ընկալում է հանցագործությանն ու խարդախությանը հակված կարծրատիպերով։ Ընկերությունը ապօրինաբար կեղծ փաստաթղթեր է պատրաստել՝ թաքցնելու իր խտրականությունը»,-լրատվամիջոցին ասել է CFPB-ի տնօրեն Ռոհիտ Չոպրան։
