15.11.2024 | 21:06
Լրագրողական կազմակերպությունների հայտարարությունը ԱԺ-ում լրագրողի աշխատանքի խոչընդոտման կապակցությամբ
Ջալալ Հարությունյանի նկատմամբ հակահարձակման դրվագով քրեական հետապնդումը դադարեցվել է
Հասարակություն
08.11.2023 | 11:23
2020 թ․ հոկտեմբերի 7-ին իրականացված հակահարձակման դրվագով հանրային քրեական հետապնդումը ՊԲ նախկին հրամանատար Ջ․Հարությունյանի նկատմամբ դադարեցվել է արդարացնող հիմքով։ Այս մասին տեղեկացնում է Հարությունյանի պաշտպան Արսեն Սարդարյանը։
«Շուրջ 306 էջանոց Ռազմագիտական հանձնաժողովային փորձագիտական եզրակացությամբ թվով 11 փորձառու ռազմագետների կողմից միակարծիք փաստվեց, որ Ջ․Հարությունյանի գործողություններում հակահարվածի դրվագով հանցակազմ չկա, վերջինս հակահարձակման ժամանակ գործել է բարեխիղճ, զգոն և գրագետ։
Ցավոք, չնայած այն հանգամանքին, որ նույն վերոգրյալ փորձագիտական եզրակացության բովանդակությունից ակնհայտ է, որ 2020թ․ հոկտեմբերի 12-ի Ցորի զորամասի Դ-20 դիվիզիոնի վրա հակառակորդի հարձակման հետևանքով ունեցած կորուստների մասով Ջ․Հարությունյանի մեղքը առերևույթ բացակայում է, և որ դրա պատասխանատվությունը ամբողջությամբ Դ-20 դիվիզիոնի հրամանատարության վրա է, սակայն այս մասով հանրային քրեական հետապնդումը չի դադարեցվել, ինչը խիստ մտահոգիչ է»,- նշել է Սարդարյանը։
Հիշեցնենք՝ Քննչական կոմիտեն երկու դրվագ է ներկայացնում ՊԲ նախկին հրամանատար Հարությունյանի մեղադրանքից։ Մեկը 2020 թվականի հոկտեմբերի 7-ի հայկական կողմի ձեռնարկած հակահարվածի մասին է, այն դեպքում, երբ հայկական կողմը 1։5 հարաբերակցությամբ թե՛ քանակապես, թե՛ որակապես զիջել է հակառակորդին, մինչդեռ մարտական կանոնադրությամբ հարձակողական գործողության ժամանակ անհրաժեշտ է հակառակորդին գերազանցել 1:3 հարաբերակցությամբ, հակահարված իրականացնող ստորաբաժանումների միջև բացակայել է փոխգործակցությունը։
Նախաքննական մարմնի փոխանցմամբ՝ Հարությունյանի այս գործողություններն անզգուշությամբ առաջացրել են ծանր հետևանքներ՝ ձախողվել է բանակային հակահարվածը։ Ավելի ուշ Հարությունյանը ձևավորել է նոր զրահախումբ և նրանց առջև, ըստ էության, դրել նույն մարտական խնդիրը, այն դեպքում, որ այս նոր զորախումբը էապես զիջել է հոկտեմբերի 7-ին հակահարձակման օպերացիայում ընդգրկված ուժերն ու միջոցները։
Հոկտեմբերի 8 -ի այդ մարտական առաջադրանքը ևս ձախողվել է, առաջացնելով ծանր հետևանքներ։ Խոսքը Ջաբրայիլի հատվածում Լելե Թեփե բարձունքը հետ գրավելու փորձի մասին է։
Ջալալ Հարությունյանի նկատմամբ ընտրվել էր ստորագրություն չհեռանալու մասին խափանման միջոցը։
