Քաղաքականություն
07.11.2023 | 10:42
Հայաստանի գլխավոր շտաբի պետ Էդվարդ Ասրյանն այցելել է Շտուտգարտում գտնվող ԱՄՆ Եվրոպական հրամանատարության (EUCOM) կենտրոնակայան։ Այս մասին հայտնում է DW-ի ռուսական ծառայությունը՝ հղում կատարելով Հայաստանի պաշտպանության նախարարությանը։
«Նոյեմբերի 3-ին Շտուտգարտ կատարած այցի շրջանակներում գեներալ-լեյտենանտ Ասրյանը EUCOM-ի հրամանատարի տեղակալ Սթիվեն Բաշամի հետ քննարկել է տարածաշրջանային անվտանգությանը, հայ-ամերիկյան ռազմական համագործակցության զարգացմանը, ինչպես նաև Հայաստանի զինված ուժերում բարեփոխումների իրականացմանն ԱՄՆ-ի աջակցությանը վերաբերող հարցեր:
Հայաստանի պաշտպանության նախարարության հաղորդագրության մեջ ասվում է, որ Սթիվեն Բաշամը հայտնել է Միացյալ Նահանգների պատրաստակամությունը՝ շարունակելու ներկայիս աջակցությունը Հայաստանի զինված ուժերին, ինչպես նաև համագործակցության նոր ուղղություններ նախաձեռնել այնպիսի ոլորտներում, ինչպիսիք են ռազմական կրթությունը, ռազմական բժշկությունը, խաղաղապահությունը և մարտական պատրաստությունը։
Բացի EUCOM-ի կենտրոնակայանից, Էդվարդ Ասրյանը նաև այցելել է Հոհենֆելսում տեղակայված ԱՄՆ բանակի Եվրոպայի միացյալ բազմազգ ուսումնական կենտրոն և ենթասպայական կազմի ակադեմիա»,- գրում է գերմանական լրատվամիջոցը։
