Հասարակություն
06.11.2023 | 20:17Ակտիվիստ Արթուր Չախոյանի ֆեյսբուքյան ուղիղ հեռարձակումից հետո Երևանի քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ը հաղորդում է ներկայացրել Ոստիկանություն։ ՀՈԱԿ-ը Չախոյանի գործողությունները վանդալիզմ է համարել և նշել, որ դրանք բացասական ազդեցություն կունենան ծառերի կենսունակության վրա: Ուղիղ հեռարձակմամբ Չախոյանը պնդել էր, թե Մաշտոցի պողոտայում նոր տնկված արևելյան սոսիների մի մասը չորացած է և կեղևազրկել ծառի մի հատված։ Այսօր արդեն Factor TV-ի հետ զրույցում ասաց՝ ինքը ոչ թե վնասել է ծառերը, այլ ցույց տվել, որ դրանք տնկվել են արդեն իսկ չորացած վիճակում։
Կանաչապատման ՀՈԱԿ-ի տնօրեն Արմեն Բեգոյանի խոսքով՝ Չախոյանը փորձում է մոլորեցնել հանրությանը։ Բեգոյանը պնդում է՝ տնկանյութը չորացած չէ, պարզապես ծառերը գտնվում են բնական վեգետացիոն շրջանի ավարտի փուլում, և քանի որ բաց գրունտում տնկված չեն եղել, այլ պահպանված են եղել փակ հողագնդով՝ թաղարի մեջ, ծառերի վեգետացիան ուշ սկսվում և շուտ ավարտվում է։
Չախոյանն ուղիղ հեռարձակման ընթացքում ծառի չորացած լինելն ապացուցելու համար պոկում է ճյուղը։ Ծառերի վրա այլ պոկված ճյուղեր էլ կան, որոնք, ըստ Բեգոյանի, գուցե տեղափոխման ժամանակ են վնասվել։ Գնված տնկանյութերը մեկ տարի երաշխիքային սպասարկման մեջ են, եթե չորացած լինեին, մատակարարները պետք է վերականգնեին վնասը։
Չախոյանը կարծում է, որ իր դեմ, այսպես ասած, արշավ է սկսվել՝ հանրային գործունեություն իրականացնելու համար։
ՀՈԱԿ-ի ներկայացրած հաղորդումը Ոստիկանությունը փոխանցել է Քննչական կոմիտե։ Կոմիտեից հայտնեցին, որ քրեական վարույթ չի նախաձեռնվել՝ հիմքերի բացակայությամբ պայմանավորված։
Հիշեցնենք, որ երկու օր առաջ էլ վնասվել և մասնակի հատվել են Կարմիր գրքում գրանցված սոսիներ, որոնք գտնվում են Մաշտոցի 52 հասցեում կառուցվող հյուրանոցի դիմաց։ Կենսունակությունը գրեթե կորցրած 100-ամյա ծառի արմատային համակարգի մոտ հայտնաբերվել են քիմիական նյութեր և հատուկ սարքով արված անցքեր: Այս մասով ևս ՀՈԱԿ-ը հաղորդում կներկայացնի Ոստիկանություն։
Մանրամասները՝ տեսանյութում։
Արփի Հակոբյան
