Աններելին Թումանյան մեջբերելն է, թե գործուղումը․ թանգարանի տնօրենը դատարանում կվիճարկի ազատման հրամանը․ ՏԵՍԱՆՅՈՒԹ

Հովհաննես Թումանյանի թանգարանի տնօրեն Անի Եղիազարյանին աշխատանքից հեռացրել են: Ամեն բան սկսվել է այն բանից հետո, երբ սեպտեմբերի 5-ի գրությամբ թանգարանի տնօրենը դիմել է ԿԳՄՍ նախարարություն՝ սեպտեմբերի 19-ից հոկտեմբերի 11-ը Ուրուգվա և Արգենտինա մեկնելու թույլտվության խնդրանքով՝ գիտաժողովների մասնակցելու նպատակով։

Նախարարությունից պարզաբանեցին, որ կառույցը նպատակահարմար չի գտել թանգարանի սուղ ֆինանսական միջոցների հաշվին 23 օր թանգարանի տնօրենի գործուղումը կազմակերպել Ուրուգվայի Հանրապետություն և Արգենտինայի Հանրապետություն՝ հաշվի առնելով նաև թանգարանի կապիտալ վերանորոգման աշխատանքները:

Եղիազարյանը, սակայն, կարծում է՝ իրեն չեն ներել Հայաստանի սահմաններից դուրս Հովհ. Թումանյանի մտքերից մեջբերումներ անելու համարձակության համար։ Ասում է՝ իր համար մի շարք հարցերի պատասխաններ անհայտ են մնում։

«Այո՛, նշվում է, որ առանց հրամանի եմ մեկնել, իսկ ինչո՞ւ ինձ չի տրվել հրաման կամ ինչո՞ւ ինձ չի տրվել չմեկնելու հրաման, ես դա էլ եմ ուզում իմանալ»,- ասում է նա։

Թանգարանի տնօրենը պարզաբանում է, որ պետական բյուջեից գործուղման համար որևէ գումար չի ծախսվել։ Նրա խոսքով՝ ծախսերի մեծ մասը հոգացել է հրավիրող կողմը, մի փոքր մաս էլ վճարվել է արտաբյուջեի հաշվին։

Այս օրերին, ի դեպ, մի շարք մտավորականներ իրենց աջակցությունը հայտնեցին Անի Եղիազարյանին՝ նախարարությանը կոչ անելով վերանայել որոշումը։

«Յուրաքանչյուր կանոն այնքանով է արդյունավետ, որքանով օժանդակում է համակարգի գործունեությանը։ Եթե խանգարում է, ուրեմն ինչ-որ բան սխալ է։ Սա՝ մեկ։ Երկրորդ՝ պետք է վերլուծել՝ այդ կանոնները խախտելու արդյունքում պետությունն ինչ-որ բան ձեռք է բերել, թե՞ կորցրել է։ Եթե իսկապես տեղի է ունեցել որոշակի կանոնների խախտում, արդյո՞ք հեռացումը աշխատանքից լավագույն լուծումն է»,- Factor TV-ի հետ զրույցում նշեց ռեժիսոր Ռուբեն Բաբայանը։

Անի Եղիազարյանը տեղեկացրեց, որ իրավական գործընթաց է սկսելու՝ նախարարության հրամանը վիճարկելու համար։

Մանրամասները՝ տեսանյութում։

Աննա Բաբաջանյան